1 "Lelo chila munhu yowona ng'hilu yeze kuna yamazi.

Izoni wose mulibule hela mugule ngano muje,

mugule divai na maziwa bila hela bila ya maliho.

2 Habali mosang'hanila hela zenu kugula vinhu havidigwa?

Habali mosang'hana muladi kupata vinhu havigala shibe?

Nitegelezeni vinogile muladi muje ndiya inogile,

mwizadeng'helela kuja ndiya inogile ng'hani.

3 Kingeni magutwi yenu na mwize kumwangu,

nitegelezeni muladi muwe wagima.

Nizatenda na mweye lagano da siku zose.

Nizamulondani kwa kufunya umoyo fana vinimulaganile Daudi.

4 Nimtenda Daudi kuwa mulangulizi wa wanhu wa zisi,

muladi yanilavile ukalangama kwa wanhu wa zisi.

5 Sambi mwizawatanga wanhu wa zisi hamuzimanyile,

wanhu wa zisi izo wezamwizilani himahima,

kwa ichimu changu niye Mndewa Mulungu, Mulungu wenu,

kwa ichimu changu niye Yelile wa Isilaili,

nimtendani mtogozigwe."

6 Mzahileni Mndewa Mulungu kwaviya kopatika,

mtangeni, kwaviya kahabehi.

7 Wanhu wotenda mbuli zihile waleke mbuli zawo zihile,

iviya wolondeka waleke magesa yawo yehile,

na wambwelele Mndewa Mulungu, nayo kezawawonela ubazi.

Wabwele kwa Mulungu wetu, nayo kezawalekelela ng'hani.

8 Kwaviya Mndewa Mulungu kolonga,

"Magesa yangu siyo magesa yenu."

Nhendelo zangu siyo nhendelo zenu.

9 Fana ulanga viuli kutali ng'hani kufosa isi,

niivo nhendelo zangu vizili kutali na nhendelo zenu,

iviya magesa yangu yakutali na magesa yenu.

10 Fana viya mvula na seluji vivilagala kulawa kuulanga,

na havibwela kaidi uko, ving'hali voing'hwiza isi na kuitenda mimea isuke na kutimula.

Ivo isi yoweng'ha wahandaji mbeyu na yoweng'ha wanhu ndiya.

11 Iviya mbuli yangu inilonga haizabwela bule,

mbali izatenda vonilonda,

izafikiza lungilo jangu.

12 Mwizalawa Babeli kuno modeng'helela na kulongozigwa kwa tindiwalo,

milima na vilima haulongozi wenu vizalandula dizi na kwimba,

mibiki yose muna imigunda izamtowelani mang'huwa.

13 Badala ya michongoma, isi izakota misonobali,

badala ya mbigili, isi izakota muhalita,

Mbuli ino izakuwa chilaguso cha ukulu wa Mulungu.

Chizakuwa chilaguso cha siku zose,

chiya chikala siku zose.