1 Mndewa Mulungu kolonga,

"Muzindilile malagilizo yangu na mutende mbuli zinogile.

Kwaviya ulopozi wangu wahabehi kwiza,

mwizawona vonitenda voilondeka.

2 Kamweda munhu yosondelela mbuli izo,

kamweda munhu yozindilila ng'hani siku za mhumulo kwa hishima na kuleka kutenda wihi wowose."

3 Manyambenyambe woilumba na niye Mndewa Mulungu sekewagese,

"Ukweli Mndewa Mulungu kachigwaza na wanhu wake."

Iviya matowashi sekewalonge,

"Cheye mibiki inyalile."

4 Kwaviya Mndewa Mulungu kolonga,

"Matowashi wozindilila malagilizo yangu ya siku ya mhumulo,

waja wotenda mbuli zininogeza na kwamha lagano jangu,

5 nizaweng'ha hanhu ha kukumbukigwa muna ikaye yangu na ng'huta zake,

wezakumbukigwa hata wahawa wabule wana.

Nizaweng'ha mazina ya kukumbukigwa siku zose,

yayo hayezasegezigwa hata chidogo.

6 Manyambenyambe wondawailumbe na niye Mndewa Mulungu,

kwa kunisang'hanila,

na kwa kudilonda zina jangu na kuwa wasang'hani wangu,

wanhu wose wondawazindilile siku ya mhumulo bila kwambula mwiko,

wanhu wondawamhe lagano jangu,

7 wawo nizawagala kuna umulima wangu welile,

kuwadeng'heleza muna ikaye yangu ya kumpula Mulungu,

nhosa zawo na nhambiko za kutimbula zizatogoligwa hana ulupango lwangu.

Kwaviya kaye yangu izatangigwa kaye ya kumpula Mulungu kwa ichimu cha wanhu wose."

8 Mndewa Mulungu yowakunzagiza Waisilaili wapwililike kolonga,

"Nizawakunzagiza wamwenga,

kufosa waja woniwakunzagize."

9 Mweye wehi wa Waisilaili mulingile fana wanyama wa kumbago, izoni muwaje wanhu wangu.

10 Kwaviya walangulizi wawo wose vipofu,

wose wahungukiligwa na nzewele,

Wose walinga fana mbwa bubu hawabwaka,

wogona na wolota nzozi,

wokukila lusita lwose.

11 Wawo walinga fana imbwa weli na usu,

hawadaha kwiguta hata chidogo.

Wawo walinga fana wadimi welibule nzewele.

Chila imwe kolonda nzila yake mwenyewo,

chila imwe kolonda yapate gweko jake.

12 Wawo woilongela, "Izoni, chihite kuzahila divai,

ching'hwe chikoligwe divai ikangale ng'hani."

Igolo izanoga kufosa diyelo,

dizakuwa dugila kulu ng'hani.