1 Weye Mndewa Mulungu niiyo Mulungu wangu,

nizakuhishimu na kuditogoza zina jako,

kwaviya kutenda mbuli za mwazanyo kwa uwaminika,

mbuli izo kuilungila umwaka.

2 Kuditenda bululu diwe bugulu da msanga,

bululu dili na mhongono diwa tongo,

kaye za wageni zahabule,

na hazizazengigwa kaidi.

3 Lelo wanhu weli na nguvu wezakutogoza,

wanhu wa mabululu ya wasede wezakudumba.

4 Kwaviya weye kuwa hanhu ha kukimbilila ngayengaye,

na hanhu ha kukimbilila wachiwa muna yamanhesa yawo,

weye kuwa hanhu ha kukimbilila lusita lwa vulavumbi,

na mbeho lusita lwa vuke.

Mhumuzi za wanhu wasede zilinga fana beho disung'ha mhongono,

5 zilinga fana vuke muna dibwilingu.

Mbali weye kukomeleza ndwagi za wageni.

Fana wingu vidikikiza vuke da zuwa,

ivo viuzikomeleze nyila za kuhuma za wanhu watatali.

6 Hana umulima uno Mndewa Mulungu Yeli na Udahi kezasasala dugila dili na ndiya inogile kwa wanhu wa zisi zose na

dugila dili na divai inogile ng'hani.

7 Iviya Mndewa Mulungu kezadisegeza wingu da lugano dodiwagubike wanhu wose,

ngubiko ya usungu ya wanhu wa zisi zose.

8 Mndewa Mulungu kezasegeza nguvu ya ifa siku zose,

kezayahangusa masozi muna ivihanga vose,

na kezawasegezela chinyala wanhu wose muna iisi.

Mndewa Mulungu kalonga ivo.

9 Siku iyo wanhu wezalonga,

"Kweli ino niiyo Mulungu wetu,

chimuhuwila yeye, nayo kachilopola.

Ino niiyo Mndewa Mulungu yochimuhuwila.

Mwize chideng'helele na kusekelela kwaviya kachikombola."

10 Mndewa Mulungu kezaukaliza mulima uno,

mbali Wamoabu wezabojogigwa muna iisi yawo,

fana mayani yanyalile viyobojogigwa muna dikombo da cholo.

11 Wezayagolosa makono yawo fana munhu kogeza kogelela,

mbali Mndewa Mulungu kezaumala utatali wawo.

12 Kezazibomola ng'huta nhali za mhongono za Moabu na kuzigwisa hasi.