1 Lamuka, Lamuka

Igangamize weye bululu da Sayuni.

Uvale walo jako dinogile, weye Yelusalemu bululu jelile,

kwaviya wanhu hawengile ulungwana na wambule mwiko hawezakwingila kaidi kumwako.

2 Kung'hunha matimbwisi na winuke,

weye Yelusalemu ukalile ufungigwe,

Uifungule minyololo yako muisingo,

uizuhule weye usoligwe mateka.

3 Mndewa Mulungu kolonga, "Mulavigwa bila hela,

iviya mwizakomboligwa bila kuliha hela."

4 Mweye umwaka mukimbilila isi ya Misili na mukala uko.

Maabaho Waashulu wamuwonelani bila chimu chochose.

5 Mndewa Mulungu kolonga, "Vino sambi nopata faida yaki kuwona wanhu wangu wogaligwa kuutumwa?

Wawo wowatawala woigoda,

iviya zina jangu dogendelela kwehuligwa chila siku.

6 Lelo wanhu wezavimanya niye yelihi.

Siku ijo wezavimanya kuwa niye niiyo nilonga, ‘Niye nabaha.’ "

7 Lola viinogeza,

msenga kolawilila kuna umulima,

kogong'onda mbuli za tindiwalo,

kogala mbuli zinogile,

koupeta ulopozi.

Kodilongela bululu da Sayuni,

"Mulungu wako kotawala."

8 Tegeleza madizi ya wakalizi wako,

wokwimba hamwe na wodeng'helela,

kwaviya wolola kwa meso yawo wenyewo,

Mndewa Mulungu viyobwela muna dibululu da Sayuni.

9 Toweni ng'henze, mweye matongo ya Yelusalemu,

kwaviya Mndewa Mulungu kawaguma moyo wanhu wake,

kadikombola bululu da Yelusalemu.

10 Mndewa Mulungu kalagusa nguvu zake muna izisi zose,

kezawakombola wanhu wake,

iviya isi yose izawona mbuli izo.

11 Segeleni, segeleni, laweni hano.

Sekemudalise chinhu chochose chambule mwiko.

Segeleni kuno Babeli,

muisafye mweye womupapa via va kaye ya Mndewa Mulungu.

12 Lusita luno hamwizalopola kulawa,

na hamwizasegela himahima.

Kwaviya Mndewa Mulungu kezamulongolelani,

na Mulungu wa Isilaili kezamkalizani kuchisogo.

13 Lola msang'hani yotenda kwa ubala,

kezatogozigwa na kwinuligwa kuchanyha,

iyo kezakuwa kuchanyha ng'hani.

14 Wanhu wamuwone wasinhuka,

kwaviya chihanga chake chibanangika,

mbaka hawoneke fana munhu.

15 Mbali lelo kawazaganya wanhu wa zisi nyingi,

wafalume wezanyamala hupi kwa ichimu chake,

kwaviya wawona mbuli ziya hawalongeligwe,

na wozimanya mbuli ziya hawanazihulika.