1 Mfalume Saligoni wa Ashulu kamtuma mkulu wake wa watowang'hondo yahite kuna dibululu da Ashidodi. Nayo kaditowa na kaditeka. 2 Lusita ulwo Mulungu kalonga kufosela Isaya mwana wa Amozi. Mulungu kamulongela, "Vula walo da guniya diuvalile na vilatu viuvalile." Isaya katenda ivo, kakala yogenda ukengele na bila vilatu.

3 Mndewa Mulungu kalonga, "Msang'hani wangu Isaya kakala yogenda ukengele na bila vilatu kwa miyaka mitatu, kuwa chilaguso cha mbuli yondailawilile muna iisi ya Misili na muna iisi ya Kushi. 4 Mfalume wa Ashulu kezawasola mateka Wamisili na Wakushi, wakulu na wadodo. Wezasoligwa na wezagenda ukengele na bila vilatu kuno madako kunze muladi Wamisili wagumigwe chinyala. 5 Maabaho wose waihuwile isi ya Kushi na kuigodela isi ya Misili wezadumba na kugumigwa chinyala. 6 Lusita ulwo wanhu wokala mhwani wezalonga, ‘Loleni chowachipatile wanhu wochiwahuwile na kuwakimbilila wachitaze na wachilopole na mfalume wa Ashulu. Vino cheye chodahaze kuhonyokwa?’ "