1 Mndewa Mulungu kezainanga isi yose na kuileka yabule chinhu,

nayo kezavibananga vinhu vili muno muna iisi yose na kuwawinga wanhu wokala umo.

2 Ivo vondaiwe kwa wanhu wose,

wakulu wa nhambiko na wanhu,

wenevale na wasang'hani,

wenevale wa chike na wasang'hani wa chike,

wanhu wochuuza na wanhu wogula,

wanhu wokwazimisha na wanhu wokwazima,

wanhu matajili na wanhu ngayengaye.

3 Isi yose izanangigwa na kulekigwa bila ya chinhu.

Mndewa Mulungu kalonga ivo.

4 Wanhu wa isi yose wezalila,

isi izaholola na kunyala,

wanhu wohishimigwa wezakuwa nyondenyonde.

5 Isi izakwambula mwiko na wanhu wake wezaleka kuzindilila malagilizo,

wezaleka malagilizo yake na wezabena lagano jake da siku zose.

6 Ivo isi izaduwiligwa,

wakaya wake wezagaya kwa uhasanyi wawo,

na wanhu wokala muna isi wezanangigwa na kusigala wadodo.

7 Mizabibu izanyala na divai izamala,

wanhu wose wakalile wodeng'helela wezakuwa na lugano.

8 Ngoma zizaleka kudinhila,

ng'henze na nyangi zizamala,

vinubi vizaleka kulila.

9 Habule kaidi kung'wa divai na kwimba,

upele wizakuwa wa usungu kwa wang'waji.

10 Bululu dondadinangigwe dizakuwa matongo,

lwivi lwa chila kaye lwizahindigwa.

11 Muinzila wezalilila upele,

kudeng'helela kwizagaluka kulava masozi,

madizi ya kudeng'helela hayezahulikika muna iisi yose.

12 Bululu dizasigala fana tongo,

na nyivi ng'hulu zizabenigwa.

13 Fana viya zaituni ndodo muna umbiki wa mzaituni zisigale kwahigwa,

hebu nhini ndodo muna umbiki wa nhini zisigale kwahigwa,

niivo wanhu wadodo vondawasigale wagima muna iisi.

14 Wanhu wawo wolandula madizi yawo na woguta nyangi kwa kudeng'helela,

wogong'onda ukulu wa Mndewa Mulungu kulawa ubanzi wa uswelo wa zuwa.

15 Wanhu waja wa ubanzi wa ulawilo wa zuwa womtogoza Mndewa Mulungu,

wanhu wa visiwa wezaditogoza zina da Mndewa Mulungu, Mulungu wa Isilaili.

16 Chozihulika nyila za nhogolwa kulawa zisi za kutali,

nyila za kumtogoza Mulungu yohumiza voilondeka.

Mbali niye niholola, kweli niholola,

nizagaya, wavwizi wezagendelela kuwa wavwizi,

na uvwizi wawo woiyoha ng'hani.

17 Kudumba na makombo na mitego, vinhu ivo vowagozela mweye womukala muna isi.

18 Yondayakimbile kudumba kezakwingila muna dikombo,

yondayalawe muna dikombo kezanamatigwa na mtego.

Mvula za gombo zizatonya,

na vandusilo va isi yose vizatingisigwa.

19 Isi izabeneka beneka,

izatulika na kutingisigwa.

20 Izazalika fana viya munhu yakoligwe,

izahembelusigwa fana chiheha chisoligwe na mbeho,

izakandamizigwa na mbahasha ya uhasanyi,

iviya vondaigwe haizakwinuka kaidi.

21 Siku ikwiza Mndewa Mulungu kezaitagusa milungu imwenga na wafalume wa isi.

22 Wose wezaduganyigwa fana wafungwa muna dituka,

wezakwikigwa hamwe muna ichifungo kwa siku nyingi,

maabaho wezatagusigwa.

23 Bung'hulo da mwezi dizakwaga,

na bung'hulo da zuwa dizakwaga,

kwaviya Mulungu Yeli na Udahi kezatawala kudibululu da Yelusalemu muna umulima Sayuni.

Wakulu wezawona ukulu wake.