1 Ulotezi uno usonhela kolongo da malaguso.

Habali wanhu wose wakwela kuna ivisuwili vawo vibadagale kudeng'helela?

2 Habali modeng'helela na kulandula madizi,

habali bululu jose disangalala na dimema ng'henze?

Wanhu wakomigwe hawakomigwe na zele na hawakomigwe kuing'hondo.

3 Wakulu wa watowang'hondo wako wose wakimbila,

watekigwa wang'hali hawanakwega msale.

Wawo wose wasoligwa,

ingawa wakala wakimbila kutali.

4 Lekamana nomulongelani,

"Nilekeni nilile kwa usungu,

kwa ichimu cha kunangigwa kwa wanhu wangu.

Sekemugeze kunigela moyo."

5 Mndewa Mulungu Yeli na Udahi kasagula siku,

siku ya tibwilitibwili na kuibojoga na kudumba ng'hani muna dikolongo da malaguso.

Ng'huta za bululu zibomoligwa,

iviya ndilo ya wakaya wake yohulikika mbaka kuna imilima.

6 Watowang'hondo wa Elamu wapapa misale na mhinde,

wakwelafalasi weza na matololi yobululigwa na falasi,

watowang'hondo wa Kili wazisasala ngao zawo.

7 Weye Yelusalemu, mabawe yako yanogile yamema matololi ya kubululigwa na falasi,

wakwelafalasi wamala kuisasala muna zinyivi zing'hulu za bululu.

8 Mulungu kasegeza ukalizi muna iisi ya Yuda,

siku iyo muhita kusola via va ng'hondo vikigwe muna ikaye itangigwa kaye ya muimbago.

9 Muwona nyatu za ng'huta za bululu da Daudi kuwa nyingi,

iviya musola mazi kulawa kudilamba dili hasi.

10 Muzilaula kaye za Yelusalemu,

muzibomola kaye zimwenga muladi kupata mabwe ya kuzengela ng'huta za bululu.

11 Mgati ya ng'huta izo muhimba mfulunda wa mazi,

mazi yayo yalawa lamba da umwaka.

Mbali hamuhuwile Mulungu yoyailungile mbuli zino zose,

hamumgesile yeye yailungile mbuli zino umwaka.

12 Siku iyo Mndewa Mulungu yeli na Udahi kamulondani mulile na mulave masozi,

muwegule yamatwi na muvale maguniya.

13 Mbali mweye musekelela na kudeng'helela,

muchinja ng'ombe na ng'hondolo,

muja nyama na kung'wa divai.

Iviya mulonga, "Leka chije na kung'wa kwaviya igolo chizadanganika."

14 Mndewa Mulungu Yeli na Udahi kaniloteza, kalonga,

"Kweli hawezalekelelwa wihi uno,

wezadanganika na hawezalekelelwa.

Niye Mndewa Mulungu Nili na Udahi nilonga ivo."

15 Mndewa Mulungu yeli na Udahi kanilongela nihite kwa Shebina, ndolezi wa kaye ya mfalume, nimulongele,

16 "Kotenda choni hano?

Vino yelihi yakutogolele uwandigwe hano,

mbaka koihimbila leme muna uluwe lwa mulima?

17 Lola weye kuna nguvu,

mbali Mndewa Mulungu kezakugwila na kukwasa kutali ng'hani.

18 Kezakuzingiliza na kezakwasa fana mpila mbaka muna iisi ngalamu.

Kwizadanganikila uko habehi na matololi yako ya kubululigwa na falasi yougodela,

weye kuiguma chinyala kaye ya mfalume wako.

19 Mndewa Mulungu kezakusegeza muna ukulu wako

na kukulava hanhu hawili."

20 Siku iyo nizamtanga msang'hani wangu Eliakimu mwana wa Hilikia. 21 Nizamvaza walo jako diuvala, nizamfunga mkwiji wako na kumwing'ha ukulu wako, iyo kezakuwa tata kwa wanhu wa bululu da Yelusalemu na wanhu wa Yuda. 22 Nizakwika muna diyega jake luvugulo lwa lukolo lwa Daudi. Yahavugula habule yodaha kuhinda na yahahinda habule yodaha kuvugula. 23 Nizamgangamiza Eliakimu fana msumali muna ing'huta, nayo kezahishimigwa muna ikaye ya tati yake. 24 Wanhu wose wa kaye yake na lukolo lwake, wadodo na wakulu wotumbika kumwake fana nongo na mahamha viyotumbikigwa muna ing'huta.

25 Mbali Mndewa Mulungu Yeli na Udahi kolonga, "Siku iyo msumali ugongomigwe muna ing'huta wizalagala. Wizabeneka na kugwa kwa nzamo woutumbikiligwe." Mndewa Mulungu kolonga ivo.