1 Mndewa Mulungu kolonga,

"Wezagaya wanangu wonilema,

waja wolonda kutenda voilonda mizoyo yawo na siyo vonilonda niye,

woitogolela kutenda lagano diya hadilawile muna umoyo wangu,

woimemezela uhasanyi.

2 Wohita Misili bila kulongeligwa na niye.

Wolonda kutazigwa na mfalume wa Misili,

ivo wakimbilile kuna iisi ya Misili wakakalizigwe nayo.

3 Mbali wahakalizigwa na mfalume wa Misili wezapata chinyala,

sisila da Misili dizawagalila chinyala.

4 Ingawa vinyandama wawo wafika bululu da Soani,

na wasenga wawo wafika muna dibululu da Hanesi,

5 wose wezagumigwa chinyala kwaviya wowahuwila Wamisili weli hawafaya,

Wamisili hawawataza na hawafaya chinhu,

mbali wogala chinyala na kuzehigwa."

6 Ulotezi usonhela wanyama wa isi ya Negebu,

"Wasenga wofosa muna iisi ya manhesa na magayo,

umo muna simba na mazoka yeli na sumu,

wowapapiza mhunda wawo vinhu vingi,

na wowapapiza ngamia ngama zawo,

wavigale kwa wanhu hawafaya chinhu.

7 Kwaviya kutazigwa na wanhu wa Misili hakufaya,

ivo noitanga isi ya Misili ‘Lahabu’ ng'onyo haditenda chochose."

8 Mulungu kanilongela niwandikile mbuli ino muna ichitabu,

muladi iwe ukalangama siku zose.

9 Wanhu wano walema kumtegeleza Mndewa Mulungu,

niiwawo wana wavwizi,

wolema kutegeleza mafundizo yake.

10 Wowalongela walotezi,

"Sekemulole na sekemulave ulotezi,

Sekemuchilongele ukweli,

mbali muchilongele mbuli za kuchitogoza,

laveni ulotezi wa uvwizi muhala.

11 Hindukeni na kuleka nzila ya ukweli,

sekemuchilongele kaidi mbuli za Mulungu Yelile wa Isilaili."

12 Ivo Mulungu Yelile wa Isilaili kolonga,

"Mweye muulema usenga wangu,

muilunga kubamanya na kuvwiza.

13 Ivo kumwenu uhasanyi uno wizakuwa fana ng'huta nhali ili na lwatu,

voigwa himahima kwa kusinhukila.

14 Kugwa kwa ng'huta iyo kulinga fana kutulika kwa nongo itulike vihile ng'hani,

bila kusigala chizae cha kuhalila moto hebu kutekela mazi."

15 Mndewa Mulungu, Mulungu Yelile wa Isilaili kolonga,

"Muhanibwelela na kusama mwizakomboligwa,

muhanyamala na kunihuwila mwizapata nguvu.

Mbali mweye hamulondile.

16 Mulonga, ‘Cheye chizakimbila na falasi wokimbila.’

Ona mwizakimbila na falasi wokimbila,

mbali falasi wa wehi wenu wokimbila ng'hani.

17 Wanhu 1,000 wezakimbila kwa kumdumba munhu imwe,

iviya wanhu watano wezamdumbizani,

wose mwizakimbila,

mbaka vondamulekigwe fana biki da kutumbikila bendela vodikwima diidumwe uchanyha ya mulima."

18 Ivo Mndewa Mulungu kogozela muladi yamuwoneleni ubazi.

Mndewa Mulungu niiyo Mulungu wa haki,

wamweda wanhu wose womgozela.

19 Mweye wanhu wa Sayuni womukala Yelusalemu, kweli hamwizatenda matanga kaidi. Kweli Mulungu kezamuwonelani ubazi, vondayahulike vimupula kutazigwa kezamwidikani. 20 Ingawa Mndewa Mulungu komwing'hani magayo na manhesa fana ndiya ya chila siku, Mulungu yomfunzani hezaifisa kaidi. Mwizamuwona kwa meso yenu. 21 Muhahindukila kulume hebu kumoso, magutwi yenu yezahulika dizi kuchisogo chenu dolonga, "Koleni nzila ino." 22 Mwizainanga milungu yenu ya hela na nyang'hiti zenu za zahabu. Mwizavasa fana vinhu vambule mwiko kuno molonga, "Sekemuwoneke kaidi."

23 Vondamuhande mbeyu zenu, Mndewa Mulungu kezagala mvula kwa lusita lwake, nazo zizakula na kulava mavuno mengi. Fugo nayo izapata ndiya nyingi. 24 Ming'ombe yenu imilume na vihongwe wenu wa kulimila wezapata mgina usasaligwe vinogile. 25 Lusita lwizafika wehi wezakomigwa na malingo yezabomoligwa, vizanda vizakilima kulawa muna imilima na vilima. 26 Iviya mwezi wizabung'hula fana zuwa na zuwa dizabung'hula miyanza saba ya bung'hulo jake da chila siku, fana bung'hulo da siku saba muna isiku imwe. Mbuli zose zizalawilila lusita Mndewa Mulungu vondayavifunge na kuvihonya vilonda viyaweng'hile wanhu wake.

27 Loleni Mndewa Mulungu kokwiza kulawa kutali,

kana ludoko na kokwiza na yosi dofuka,

mbuli zake zolagusa ludoko lwake,

mbuli zoyolonga zilinga fana moto utimbula.

28 Mhumuzi yake ilinga fana lwanda lukilima ng'hani,

mazi yake yofika muisingo,

kokwiza kuwabeta wanhu wa zisi na kuwananga,

kowafunga nzabi izisingo na kowagala hanhu hawahalonda.

29 Mwizakwimba fana viya vimwimba muna yamadugila ya ichilo,

fana vimutenda muna ingonelela ya dugila jelile.

Mizoyo yenu izadeng'helela fana viya wanhu viwokwela na vilongelonge,

viwokwela muna umulima wa Mndewa Mulungu yeli luwe wa Isilaili.

30 Mndewa Mulungu kezawatenda wanhu wose wadihulike dizi jake kulu,

wezawona viyeli na ludoko ng'hani.

Kwizakuwa na lumwemwe na vulavumbi na mbumo wa ng'huwa na mvula ya mabwe.

31 Waashulu wezadumba vondawahulike dizi da Mndewa Mulungu,

kezawalanha na balati jake.

32 Chila hulo da nhaguso ya Mndewa Mulungu kusonhela Waashulu dizahulikika hamwe na ngoma na bango,

yeye mwenyewo kezaitowa na Waashulu.

33 Kweli hanhu ha kumdanganizila mfalume wa Ashulu hasasaligwa mwaka.

Hanhu baho niijo kombo kulu na galamu,

moto na ngodi nyingi vokwaka umo.

Mndewa Mulungu kezahuvila mhumuzi yake muna umoto uwo,

na kuukwacha fana chibiliti.