1 Nitegelezeni mweye wanhu wa zisi zili kutali,

kingeni digutwi mweye wanhu muli kutali.

Mndewa Mulungu kanitanga ning'hali sinavumbuka,

kanitambula zina jangu ning'hali muna iinda ya mami yangu.

2 Kazitenda mbuli zangu zikutwe fana zele,

kanifisa kwa mkono wake.

Kautenda usenga wangu usongoke fana msale,

kanifisa fana msale muna umkwiji wake.

3 Kanilongela, "Weye msang'hani wangu Isilaili,

kwa ichimu chako, nizawatenda wanhu wanitogoze."

4 Mbali niye nilonga,

"Nisang'hana bule,

niiyoha kusang'hanila bila kupata chochose.

Mbali Mndewa Mulungu kaning'ha haki yangu,

gweko da sang'hano yangu kezaning'ha Mulungu mwenyewo."

5 Mndewa Mulungu kanisagula kwandusila ning'hali muna iinda ya mami yangu,

muladi niwabweleze welesi wa Yakobo kumwake,

niwaduganye welesi wa Isilaili kumwake.

Mndewa Mulungu koning'ha hishima.

Mulungu wangu kaning'ha nguvu.

6 Mndewa Mulungu kanilongela,

"Haifaya kulonga weye msang'hani wangu,

muladi uyabweleze makabila ya Yakobo,

na kuwabweleza wanhu wa Isilaili wasigale.

Mbali iviya nizakutenda uwe bung'hulo muna izisi zose,

muladi wanhu wa zisi zose wakomboligwe."

7 Mndewa Mulungu yeli Mkombola na Mulungu Yelile wa Isilaili,

kamulongela ija yehuligwe ng'hani,

ija yehiligwe na wanhu wa zisi zose,

yeli msang'hani wa watawala,

"Wafalume wezakuwona,

nawo wezakwima,

wakulu wezakuwona na wezakutumbalila mavindi,

kwa kunihishimu niye Mndewa Mulungu.

Niye Mulungu nizafikiza vilagano vangu,

niye Mulungu Yelile wa Isilaili, niiyo yonikusagule weye."

8 Mndewa Mulungu kolonga,

"Lusita lufaya nizawedika chompula,

lusita lwa ukombola nizawataza.

Nizawakaliza na kutenda lagano na wanhu wa zisi zose kufosela mweye,

mwizaizenga kaidi isi ino na kuibweleza isi ino ibanangigwe.

9 Mwizawalongela wafungwa, ‘Laweni muna ichifungo,’

iviya mwizawalongela waja wakalile muna diziza, ‘Izoni kunze kuna dibung'hulo.’

Chila hanhu howohita wopata ndiya hata kuna ivilima wopata ndiya.

10 Hawezawona nzala hebu ng'hilu,

vulavumbi da vuke hebu zuwa havizawasoma,

niye niwawonele ubazi nizawalongoza na kuwagala muna zinzasa.

11 Nizaitenda milima yangu yose kuwa makulugumbi,

nizatenda nzila ng'hulu za kufosa wanhu wangu.

12 Wanhu wangu wezabwela kulawa kutali,

wamwenga wezalawa ubanzi wa kasikazi na ubanzi wa uswelo wa zuwa,

wamwenga wezalawa isi ya Sinimu ili ubanzi wa kusi."

13 Imba kwa deng'ho, weye ulanga.

Deng'helela weye isi.

Weye mulima, imba na kudeng'helela,

kwaviya Mndewa Mulungu kawaguma moyo wanhu wake,

kawawonela ubazi wanhu wake wogaya.

14 Wanhu wa Sayuni wolonga,

"Mndewa Mulungu kachileka chiidumwe.

Mndewa Mulungu kachizimiza."

15 Mbali Mndewa Mulungu kolonga,

"Vino mama kodaha kumzimiza mwana iyomong'heza,

na kumwihila mwana iyamvumbule?

Mbali one yahamzimiza mwanage,

niye sizamzimizani.

16 Weye Yelusalemu, zina jako nijandika muna diganza jangu,

ng'huta zako noziwona kuulongozi wangu siku zose.

17 Wondawazenge kaidi wokwiza himahima,

waja wokubananga wezasegela.

18 Inula meso ulole banzi zose,

wanhu wako wose woiting'hana na kukufikila.

Noilaha niye Mndewa Mulungu, Mulungu wako,

wanhu wako wezakuwa fana mahambo,

kwizawavala fana viya muke viyovala usalu wake na kunogeza.

19 "Weye bululu da Yelusalemu kusigala matongo,

ukazi wako usigala wabule chinhu,

iviya isi yako idanganizigwa,

mbali sambi izakuwa ndodo ng'hani kwa wanhu wokala umo.

Wanhu wakunangile wezasegezigwa kumwako.

20 Wanago waleligwe kuna uuhami wokuyalalila, wolonga,

‘Isi ino ndodo ng'hani,

uching'he hanhu ha kukala.’

21 Ivo kwizaiuzagiza mwenyewo,

‘Vino yelihi yanyelekele wana wano wose?

Nifiligwa na wana bila ya kupata wamwenga.

Nigaligwa kuuhami na nyasigwa kutali.

Vino yelihi yowalola goya wana wano?

Niye nilekigwa niidumwe,

lelo wano walawa kulihi?’ "

22 Mndewa Mulungu kolonga,

"Nizawatanga wanhu wa zisi zimwenga kwa kuwagolosela mkono,

nizawasimikila bendela weze.

Nawo wezawabwelela wanenu kuno wowapapa hachaha,

iviya wanenu wa chike wezapikigwa.

23 Wafalume wezawasang'hanila,

na wake zawo wezawalela.

Wezakutumbalila mavindi na kukwing'ha hishima na kwamha migulu yako.

Baho kwizavimanya kuwa niye iyo Mndewa Mulungu,

wanhu wonihuwila hawezagumigwa chinyala."

24 Wanhu wa Yelusalemu wolonga,

"Vino galu kodaha kuhokigwa vinhu viyatekile?

Hebu wafungwa wa munhu msede wodaha kukomboligwa?"

25 Mndewa Mulungu kolonga,

"Kweli, vinhu viyatekile galu vizabwelezigwa.

Wafungwa wa munhu msede wezakomboligwa,

niye mwenyewo nizaitowa na wehi wenu,

niye mwenyewo nizawakombola wanenu.

26 Nizawatenda wanhu womuwonelani waje nyama yawo wenyewo,

wezakoligwa damu yawo wenyewo fana divai.

Wanhu wose wezavimanya niye niiyo Mndewa Mulungu,

Mulopozi wenu, Mulungu wa Yakobo Nili na Udahi."