1 Vino yelihi yahuwile mbuli zochihulike?

Vino yelihi yawonile nguvu ya Mndewa Mulungu?

2 Kwaviya haulongozi wa Mndewa Mulungu, msang'hani wake kagoloka fana sukuzi,

kalinga fana zizi muna iisi inyalile.

Hakalile na chihanga chinang'hane,

na hakalile na unovu wowose wa kunogeza.

3 Kazehigwa na kulemigwa na wanhu.

Kakala munhu wa manhesa na yazowele mawine,

kakala munhu yozehigwa na wanhu,

kehuligwa na chimuwona mbozi.

4 Mbali kafunyila umoyo usungu wetu,

iviya kaitwika lugano jetu,

cheye chigesa Mulungu kamtagusa,

kamtowa na kumgaza.

5 Mbali kalumizigwa kwa ichimu cha uhasanyi wetu,

katagusigwa kwa ichimu cha wihi wetu,

nhaguso yake ichigalila tindiwalo,

viyatowigwe, cheye chihona.

6 Cheye chose chaga fana ng'hondolo,

chila imwe wetu kasondelela nzila yake mwenyewo,

mbali Mndewa Mulungu kamtagusa nhaguso ichilondeke kutagusigwa.

7 Kagazigwa na kawoneligwa,

mbali kafunya umoyo na halongile mbuli.

Kalinga fana mwanang'hondolo viyogaligwa kuchinjigwa,

fana ng'hondolo viyonyamala, lusita viyokanhigwa mazoya yake.

Iviya halilile.

8 Kabamanyigwa na katagusigwa,

kagaligwa kukomigwa na habule munhu yagesile mbuli zimpatile.

Kawingigwa kulawa isi ya wanhu weli wagima,

kwa ichimu cha uhasanyi wa wanhu wangu.

9 Viyadanganike wamuwanda hamwe na matajili,

kekigwa hamwe na wahasanyi,

ingawa hatendile usede wowose,

iviya halongile mbuli yoyose ya uvwizi.

10 Mndewa Mulungu kalonda kumulumiza na kumtenda yakale moyo yau,

Kamulava kuwa nhambiko ya kusegeza uhasanyi.

Mbali msang'hani wa Mulungu kezawona welesi wake na kezakala siku nyingi.

Yeye kezafikiza lungilo da Mndewa Mulungu.

11 Mulungu kolonga, "Msang'hani yahakomeleza kugazigwa ng'hani,

kezadeng'helela viyovimanya mbuli impatile,

msang'hani wangu kezawatenda wanhu wengi wanoge haulongozi wangu,

kwaviya kezatagusigwa kwa uhasanyi wawo.

12 Ivo nizamuhanganya hamwe na wakulu.

Kezavigola vinhu vitekigwe hamwe na weli na nguvu,

kwaviya kailava mwenyewo yadanganike,

kekigwa hamwe na wahasanyi.

Katagusigwa kwa uhasanyi wa wanhu wengi na kawapulila wahasanyi."