1 Wezagaya waja wohita Misili kupula kutazigwa,

wezagaya wohuwila falasi,

wohuwila matololi mengi yobululigwa na falasi,

na nguvu za wakwelafalasi,

nawo hawamuhuwila Mulungu Yelile wa Isilaili,

hawampula Mndewa Mulungu yawataze.

2 Mulungu kana ubala na kodanganiza,

hagalula chiyolonga, mbali kaisasala kuwatagusa wanhu wotenda mbuli zihile,

hamwe na wanhu wowataza.

3 Wamisili wanhu fana cheye na siyo Mulungu,

falasi wawo wanyama siyo muhe.

Mndewa Mulungu yahaugolosa mkono wake,

wanhu wowataza wezaikwala,

na wanhu wotazigwa wezakugwa.

Wose wezanangigwa hamwe.

4 Mndewa Mulungu kanilongela,

"Nizakuwa fana simba yotongoloma,

fana simba yotongoloma kuukala.

Ingawa bumbila da wadimi woiting'hana kuniwinga,

sidumba nyangi zawo,

na sisinhuligwa na madizi yawo.

Ivo Mndewa Mulungu vondayahumuluke na watowang'hondo wake kuitowa uko kuna umulima Sayuni na vilima vake.

5 Fana viya ndege viyokaliza mvulu yake,

niivo vondanidikalize bululu da Yelusalemu.

Nizadikaliza na kuwakombola,

sizaditagusa mbali nizadika goya."

Ivo Mndewa Mulungu vondayeze kuitowa ng'hondo kuna umulima Sayuni.

6 Mweye Waisilaili, mbweleleni ija yomulemile kumtegeleza. 7 Siku zikwiza mwizakwasa nyang'hiti zenu za hela na zahabu zimuzitendile.

8 Baho Waashulu wezakomigwa kwa zele,

mbali siyo zele da chiunhu.

Wezadanganizigwa kwa zele.

Wezakimbila, wana wawo wa chilume wezatenda sang'hano za chitumwa.

9 Mhongono zawo zizatekigwa kwaviya wodumba,

wodumba na kuikimbila bendela ya ng'hondo.

Mndewa Mulungu yotambikiligwa uko Yelusalemu na yeli na moto ukwaka uko.