1 Siku izo mfalume Melodaki Baladani wa Babeli, mwana wa Baladani, kamtumila Hezekia usenga na vitumetume, kwaviya kahulika kuwa Hezekia kaugula na kahona.

2 Hezekia kawahokela vinogile wasenga waja na kawalagusa vinhu vikalile muna yamadungu yake, hela na zahabu na vilungo va kwambikila ndiya, mavuta ya bei ng'hulu, via vake vose va ng'hondo na vinhu vose vikalile muna zingama zake. Habule chochose hawalaguse muna ikaye yake ya chifalume hebu muna iisi yake.

3 Baho mulotezi Isaya kahita kwa mfalume Hezekia na kamuuza, "Wanhu wawo walonga choni na walawahi?" Nayo mfalume Hezekia kamwidika, "Walawa isi ya kutali ya Babeli."

4 Mulotezi Isaya kauza, "Wawona choni muna ikaye yako?" Mfalume Hezekia kedika, "Wawona chila chinhu chili muna ikaye yangu. Habule chinhu siwalagusile muna ingama yangu."

5 Baho Isaya kamulongela Hezekia, "Tegeleza mbuli ya Mndewa Mulungu Yeli na Udahi. 6 Lola siku zokwiza, vinhu vose vili muna ikaye yako na vinhu vose viwakulekele wasaho zako, vizagaligwa isi Babeli. Habule chinhu chochose chondachisigale." Mndewa Mulungu kolonga ivo. 7 Iviya wanago wamwenga wondauweleke wezagaligwa Babeli na wezakuwa wasang'hani muna ikaye ya mfalume wa Babeli.

8 Hezekia kamwidika Isaya, "Mbuli ya Mndewa Mulungu iulongile inoga." Kalonga ivo kwaviya kagesa kezakala kwa tindiwalo na kezakala goya siku zose za ugima wake.