1 Vino ino yelihi yokwiza kulawa isi ya Edomu,

yofika kulawa bululu da Bosila na mawalo yeli na mawolawola madung'hu?

Vino ino yelihi yayawale mawalo ya nhogolwa,

kogenda kwa nguvu ng'hulu?

"Niye Mndewa Mulungu,

nogong'onda kuhuma kwangu,

nina nguvu ya kukombola."

2 Habali kuna walo dung'hu,

fana munhu yobojoga zabibu muladi yazikame?

3 "Kweli, nikama zabibu niidumwe,

habule munhu yezile kunitaza.

Nizibojoga zisi kwa ludoko lwangu,

nizihonda kwa ludoko lwangu.

Mawalo yangu yamema damu za wanhu wa zisi izo,

zifizile mawalo yangu.

4 Kwaviya siku ya kulihiliza ifika,

lusita lwa kuwakombola wanhu wangu lufika.

5 Iviya nilola, mbali hakukalile na munhu wa kunitaza,

nyazaganyika kwaviya habule munhu wa kuniguma moyo.

Ivo nihuma kwa mkono wangu mwenyewo na ludoko lwangu lufika.

6 Niwahonda wanhu wa zisi kwa ludoko lwangu,

niwatenda wakoligwe kwa ludoko lwangu,

damu yawo niitila hasi."

7 Nizakumbuka unovu wa Mndewa Mulungu,

nizalonga mbuli zose za kumtogoza,

kwa ichimu cha mbuli zose ziyachitendele,

viyawawonele ubazi Waisilaili kwa unovu wake.

8 Kwaviya kalonga,

"Kweli wano wanhu wangu,

wanangu, wawo hawanivwizila."

Iyo kawa mulopozi wawo.

9 Muna yamagayo yawo yose yeye iviya kagaya,

hamtumile msenga imwenga yawataze,

mbali yeye mwenyewo keza kuwalopola.

Kawakombola kwa kulonda kwake na kwa ubazi wake,

kawapapa na kawasola kwandusila umwaka.

10 Mbali wawo wakala wadugi na wamguma luholozi Muhe wake Yelile.

Ivo Mulungu kagaluka kuwa mwihi wawo,

yeye mwenyewo kaitowa nawo.

11 Baho wazikumbuka siku za umwaka,

lusita lwa Musa msang'hani wa Mndewa Mulungu.

Wauza, "Kakulihi Mndewa Mulungu yawalopole wadimi wa bumbila jake muna ibahali?

Vino kakulihi yekile Muhe wake Yelile mgati yawo?

12 Vino siyo yeye yatendile mauzauza na mawewedeko kwa mkono wake uli na nguvu kufosela Musa?

Vino siyo yeye yatulile bahali na kuwalongoza wanhu wake muladi yatogozigwe siku zose?

13 Kawalongoza hagati ya mazi ya bahali,

fana falasi muna iisi inyalile,

hawaikwalile.

14 Fana ng'ombe viwogaligwa kuja mgina kuna dibawe,

niivo Muhe wa Mulungu viyawahumuze wanhu wake.

Niivo Mulungu viyawalangulize wanhu wake, muladi yatogozigwe."

15 Weye Mulungu, uchisungulile kulawa kuulanga,

uchilole kulawa hanhu hako helile heli na ukulu.

Zakulihi nguvu zako na kuiyoha kwako kwa ichimu chetu?

Hachiwona kaidi ulondo na ubazi wako.

16 Kwaviya weye niiyo Tati yetu,

Bulahimu wasaho yetu hachigesa,

nayo Isilaili hachimanyile,

mbali weye Mndewa Mulungu niiyo Tati yetu.

Weye kutangigwa Mulopozi wetu kwandusila umwaka.

17 Weye Mndewa Mulungu, habali kochagiza nzila yako?

Habali kochitenda chiwe na mizoyo midala sekechikudumbe?

Weye Mndewa Mulungu, ubwele kwa ichimu cha wasang'hani wako,

makabila yakalile yako siku zose.

18 Cheye wanhu wako chiihazi isi lusita ludodo muhala.

Mbali wehi wetu weza kubananga kaye yako yelile.

19 Chiwa fana wanhu ung'hali hunawatawala,

fana wanhu hawamanyike kwa zina jako.