1 Mbali wanhu wakalile na uzidilwa hawezakuwa na usungu kaidi. Baho umwaka Mndewa Mulungu kazitenda zisi za Zabuloni na Nafutali zili muna iisi ya Isilaili zehuligwe, mbali baho hamwande kezaitenda isi iyo iheshimigwe, isi ili habehi na mhwani mbaka umwambu wa lwanda lwa Yoludani na muna isi ya Galilaya yowokala wanhu wa zisi zimwenga.

2 Wanhu wagendile muna diziza,

wawona bung'hulo kulu.

Bung'hulo diwamwemwesela,

wanhu wokala muna iisi ili na ziza totolo.

3 Weye Mndewa Mulungu, kongeza nyelesi muna iisi,

na kuwatenda wanhu wadeng'helele.

Wanhu wodeng'helela kuulongozi wako,

fana viwodeng'helela kugobola,

fana wanhu wodeng'helela kuigolela vinhu viwatekile.

4 Kwaviya kuzitula mbahasha zizamile za utumwa ziwapapile na kuibena mibalati ya kulanhila,

fana viutendile siku iwahumigwe Wamidiani.

5 Chila chilatu cha mtowang'hondo chisang'haniligwe kuna ing'hondo,

na chila walo dili na damu,

vizasasaligwa kwa kusomigwa,

vizakuwa fana ngodi za kubwinhila moto.

6 Kwaviya mwana kelekwa kwa ichimu chetu,

ching'higwa mwana wa chilume,

nayo kezatawala.

Kezatangigwa, Chinyandama Yofaya Ng'hani,

Mulungu Yeli na Udahi,

Tata wa Siku Zose na Mfalume wa Tindiwalo.

7 Utawala wake wizagangamala siku zose,

tindiwalo da ufalume wake dabule uhelelo,

kezatawala hana ichigoda cha chifalume cha Daudi,

kezaugangamiza ufalume wake na kuutenda ukule kwa haki na kwaminika,

kwandusila sambi na siku zose.

Mndewa Mulungu Yeli na Udahi kezatenda mbuli izo, kwaviya kochiwonela wivu.

8 Mndewa Mulungu kawalongela welesi wa Yakobo kuwa kezawatagusa.

9 Wanhu wose wa Isilaili na wanhu wa bululu da Samalia wezavimanya.

Wawo wolonga kwa magoda,

10 "Kaye za matafali na kaye za mikuyu zigwa,

mbali chizazenga kaye za mabwe na kaye za mibiki ya mielezi."

11 Mbali Mndewa Mulungu kezawasongeza wehi wa Lesini,

nawo wezawatowa Waisilaili.

12 Washami wolawa ubanzi wa ulawilo wa zuwa na Wafilisiti wolawa ubanzi wa uswelo wa zuwa,

waimela Isilaili fana mng'onyo yahamile mulomo wake.

Mbali kwa mbuli zino zose Mndewa Mulungu halekile kuwawonela ludoko,

kagendelela kuwatagusa.

13 Wanhu hawambwelele Mndewa Mulungu Yeli na Udahi yoyawataguse.

Hawalondile yawataze.

14 Lelo kwa siku dimwe muhala,

Mndewa Mulungu kezasegeza muna isi ya Isilaili matwi na mikila, tambi na sina.

15 Matwi wawo walala na wohishimigwa,

mikila wawo walotezi wowofundiza uvwizi.

16 Waja wowalanguliza wanhu wano wowagiza,

na waja wolangulizigwa wokwaga.

17 Kwa ichimu icho Mndewa Mulungu hawawonela ubazi wabwanga wawo,

hawawonela ubazi wagane na wachiwa.

Kwaviya wose hawamdumba Mulungu,

na wotenda mbuli zihile.

Kwa mbuli izo zose Mndewa Mulungu halekile kuwawonela ludoko,

kagendelela kuwatagusa.

18 Kweli mbuli za mdukula zokwaka fana moto,

woulunguza mbigili na visasa,

wokwaka kumbago na yosi jake dikwela kuulanga.

19 Kwaviya Mndewa Mulungu Yeli na Udahi kana ludoko,

isi yotimbuligwa,

wanhu wano walinga fana ngodi zikong'higwa muumoto,

habule munhu yomuwonela ubazi ndugu yake.

20 Wamwenga wezakuwa wogegeda,

mbali wezakuwa wang'hali na nzala,

wamwenga wezakuwa woja,

mbali hawezakwiguta.

Chila munhu koja nyama ya miyage.

21 Kabila da Manase diditowa kabila da Efulaimu,

kabila da Efulaimu diditowa kabila da Manase.

Hamwande makabila yose maidi yaitowa isi ya Yuda.

Mbali Mndewa Mulungu halekile kuwawonela ludoko,

kagendelela kuwatagusa.