1 Mndewa Mulungu kolonga,

"Weye mwali wa Babeli, humuluka ukale muna ditimbwisi,

weye mwali wa Babeli, kala hasi hanhu helibule chigoda cha chifalume.

Kwandusila sambi hwizatangigwa kaidi lumondo na yonogeza.

2 Sola mabwe ya kudundila na udunde mhule,

vula chitambala chako na ukwese ng'hanzu yako.

Kwesa ng'hanzu yako muladi uloke ulwanda.

3 Ukengele wako wizagubuligwa,

chinyala chako chizawoneka.

Nizalihiliza na sizamuwonela ubazi munhu yoyose."

4 Mulopozi wetu niiyo Mulungu Yelile wa Isilaili,

Mndewa Mulungu Yeli na Udahi ijo zina jake.

5 Mndewa Mulungu kolonga,

"Weye isi ya Babeli, nyamala hupi na uhite kuna diziza,

kwaviya hwizatawala kaidi falume nyingi.

6 Niwehila wanhu wangu Waisilaili,

niwatenda wambule mwiko,

niwaleka muna yamakono yako,

mbali huwawonele ubazi,

kuwapapiza walala mbahasha zizamile.

7 Kulonga muna umoyo,

‘Nizakuwa mtawala siku zose.’

Weye hugesile mbuli zondazilawilile,

na hugesila uhelelo wake.

8 "Lelo tegeleza, weye ulonda madambwa,

weye wiigesa kuwa kokalizigwa vinogile,

iviya kolonga, ‘Niye muhala,

habule imwenga mbali niye,

sizakuwa mgane na sizafiligwa na wanangu.’

9 Mbuli zino mbili zizakupata siku dimwe kwa kusinhukiza,

kwizakwagiza wanago na kuwa mgane,

ingawa weye kwa muhawi galu,

na kuna nguvu nyingi za uganga.

10 Kuzihuwila mbuli zako zihile na kulonga,

‘Habule munhu yoniwona.’

Ubala wako na kuvimanya kwako kukuvwizila,

kulonga muna umoyo wako,

‘Niye iyo niye,

habule munhu yalingile fana niye.’

11 Mbali mahulo yezakupata,

hwizadaha kuyakimbila.

Kwizapata hulo hudaha kudigwaza.

Mahulo yezalawilila kwa kusinhukila na hwizadaha kuyakimilila.

12 Gendelela na uhawi wako,

uwanduse kuudodo wako,

yodahika kwizahuma,

yodahika kwizawadumbiza wehi wako.

13 Weye kuilegeza kukala na vinyandama wako,

lelo walawilile wawo weli na nzewele wakukombole.

Wakukombole wawo wolola ulanga muladi kulotela mbuli zondazilawilile,

wozipelemba nhondo na kulotela chila chondachilawile chila mwezi.

14 Wawo walinga fana mabuwa yanyalile,

moto wizawatimbula.

Hawadaha kuikombola wenyewo na nguvu za milambi ya moto uwo.

Moto uwo siyo wa kugala vuke na siyo wa kotela.

15 Ivo niivo vondawawe wanhu waja wolola ulanga wouwahuwile,

waja woukalile nawo kwandusila viukalile mbwanga.

Wezawegela chila imwe nzila yake,

habule yondayadahe kukukombola."