1 Ulotezi usonhela isi ya Moabu,

"Ichilo chimwe bululu da Ali muna iisi ya Moabu ditimbuligwa,

na bululu da Kili muna iisi ya Moabu dinangigwa.

2 Wanhu wa bululu da Diboni wahita kuna ikaye yawo ya kutambikila,

na hana ihanhu ha kutambikila uchanyha ya milima,

muladi walile kwa ichimu cha mabululu ya Nebo na Madeba,

matwi yose na ndevu zose ziweguligwa.

3 Wofosa muna inzila kuno wavala maguniya,

wolila muna yamakulugumbi na hana yamating'hanilo ya wanhu.

Wanhu wolila kuno wagona chingubingubi.

4 Wanhu wa bululu da Heshiboni na bululu da Eleale wolila,

madizi yawo yohulikika mbaka kuna dibululu da Yahazi.

Ivo watowang'hondo wa Moabu woguta nyangi kwaviya wodumba.

5 Moyo wangu woililila isi ya Moabu,

wanhu wake wokimbilila bululu da Soali

na bululu da Egiladi Shelishiya.

Wokwela chilima cha kuhita Luhisi kuno wolila,

muna dikulugumbi dodihita bululu da Holonaimu.

Wolila kwaviya isi yawo inangigwa.

6 Mazi ya kolongo da Nimlimu yanyala na mayani yanyala,

mibiki inyala na habule chinhu chochose chikota.

7 Ivo wasola vinhu vawo na ngama zawo

na waloka Kolongo da Mielebi.

8 Ndilo ihulikika muna iisi yose ya Moabu,

matanga yawo yahulikika bululu da Egilaimu,

kweli yafika kuna dibululu da Beeli Elimu.

9 Lwanda uli habehi na bululu da Dimoni wenela damu,

mbali Mulungu kezakongeza ndilo muna dibululu ijo,

wanhu wadodo wondawasigale wagima wezadigwa na simba."