1 Mfalume Hezekia viyahulike mbuli izo, kadega mawalo yake na kayawala maguniya kulagusa kuwa kana usungu, maabaho kengila muna ikaye ya Mndewa Mulungu. 2 Kawatuma Eliakimu yoyakalile mwimilizi wa kaye ya mfalume na mwandikaji Shebina na wakulu wa nhambiko walala, wose wayawala maguniya wahita kwa mulotezi Isaya mwana wa Amozi. 3 Wamulongela, "Hezekia kolonga, ‘Diyelo siku ihile, siku ya kukalikiligwa na kugumigwa chinyala. Cheye chiwa fana muke yolonda kuvumbula mwana, mbali kabule nguvu. 4 Yodahika Mndewa Mulungu, Mulungu wako kezahulika mbuli za mkulu wa watowang'hondo yatumigwe na mwenevale wake mfalume wa Ashulu. Kamtuma muladi yamulige Mulungu yeli mgima. Nayo Mndewa Mulungu, Mulungu wako kezamzuma kwa mbuli iyahulike. Lelo wapulile wanhu wasigale.’ "

5 Wasang'hani wa mfalume Hezekia viwafikile kwa Isaya, 6 Isaya kawalongela, "Mulongeleni mwenevale wenu kuwa Mndewa Mulungu kolonga, ‘Sekeudumbe mbuli zouzihulike, mbuli ziya ziwaniligile wasang'hani wa mfalume wa Ashulu. 7 Tegeleza, nizamtenda yahulike mbuli imwenga muladi vondayahulike mbuli iyo, yabwele muna iisi yake mwenyewo. Uko nizamtenda yakomigwe na zele.’ "

8 Maabaho mkulu wa watowang'hondo viyahulike kuwa mfalume wa Ashulu kasegela bululu da Lakishi, kabwela na kamfika mfalume koitowa na bululu da Libina.

9 Mfalume wa Ashulu kahulika kuwa mfalume Tilihaka wa Kushi kokwiza kuitowa nayo. Viyahulike mbuli ino, kawatuma wasenga wakamulongele Hezekia, 10 "Mulongeleni mfalume Hezekia wa Yuda, ‘Sekeutogole Mulungu wako youmuhuwila yakuvwizile kwa kukulongela kuwa bululu da Yelusalemu hadizasoligwa na mfalume wa Ashulu.’ 11 Weye kuhulika kumala viya wafalume wa Ashulu viwawatendele wanhu wa zisi zimwenga zose na viwawanangile. Vino kogesa weye kwizahonyokwa? 12 Wasaho zangu wawanaga wanhu wa zisi za Gozani na Halani na Lesefu na wanhu wa Edeni wakalile Teliasali. Vino milungu yawo idaha kuwakombola? 13 Vino wakulihi wafalume wa mabululu ya Hamasi na Alipadi na Sefalivaimu na Hena na Iva? Wose wahabule."

14 Mfalume Hezekia kahokela usenga kulawa kwa wasenga na kuusoma, maabaho kengila muna ikaye ya Mndewa Mulungu na kawika usenga uja haulongozi wa Mndewa Mulungu.

15 Maabaho Hezekia kampula Mndewa Mulungu, kalonga,

16 "Weye Mndewa Mulungu, Mulungu wa Isilaili ukala muna ichigoda cha chifalume hagati ya makelubi, weye muhala uli Mulungu youtawala falume za zisi zose, weye kulumba ulanga na isi. 17 Weye Mndewa Mulungu, gubula meso yako ulole, kinga digutwi utegeleze maligo yose Senakelibu yoyokuliga weye Mulungu uli mgima.

18 "Weye Mndewa Mulungu, kweli wafalume wa Ashulu wawananga wanhu wawo na isi yawo. 19 Wayasa milungu yawo muna umoto kwaviya haikalile milungu ya kweli, mbali ikala nyang'hiti muhala za mibiki na mabwe yasongoligwe na makono ya wanhu. 20 Lelo weye Mndewa Mulungu, Mulungu wetu uchikombole kulawa muna yamakono ya mfalume wa Ashulu, muladi wanhu wa falume zose wavimanye kuwa weye wiidumwe niiyo Mndewa Mulungu."

21 Maabaho Isaya mwana wa Amozi katuma usenga kwa Hezekia, kalonga, "Mndewa Mulungu, Mulungu wa Isilaili kolonga, ‘Kwaviya kunipula kusonhela Senakelibu mfalume wa Ashulu, 22 uno uwo usenga wangu kusonhela mfalume iyo.’ "

"Wanhu wa bululu da Sayuni, niijo Yelusalemu,

wokuzeha na kukuliga,

wanhu wa Yelusalemu bululu dinogile,

wotingisa yamatwi kwa kukwehula.

23 Vino weye komuliga yelihi?

Vino komkeweza yelihi?

Lelo komwehula yelihi kwa magoda?

Niiyo niye Mulungu Yelile wa Isilaili.

24 Kuwasang'hanila wasang'hani wako muladi kunyehula niye Mndewa Mulungu,

weye kulonga, ‘Kwa matololi yangu mengi ya kubululigwa na falasi

nikwela milima mbaka ludonho lwa mulima wa Lebanoni,

nikanha mibiki mitali ya mielezi ya Lebanoni na misonobali yake inogile,

nifika chila hanhu uko Lebanoni,

nifika muna imibago yake imikulu.

25 Nihimba masima na ning'wa mazi ya zisi zimwenga,

nizinyaza nyanda zose za Misili kwa nyayo zangu.’ "

26 "Mndewa Mulungu kolonga, ‘Vino weye Senakelibu hunahulika kuwa niilunga kutenda mbuli ino kwandusila umwaka?

Chonitenda sambi niilunga mwaka.

Nikwika uyatimbule mabululu yeli na mhongono yawe matongo.

27 Wanhu wa mabululu yayo wakeng'heneka nguvu,

wazanywa na wagumigwa chinyala,

wawa fana masavu ya kumgunda,

fana mayani yosuka,

fana mayani yokota kuna ichisuwili,

yonyala yang'hali hayanakula.

28 " ‘Mbali niye nokumanya weye Senakelibu,

noimanya chila mbuli iutenda,

noyamanya malungilo yako yehile kumwangu.

29 Kwaviya kuniwonela ludoko,

na kwaviya nihulika vouigoda,

lelo nikwikila ndwano yangu muna imhula yako na lijamu muna umulomo wako,

muladi nikulongoze konilonda uhite.

Nizakubweleza kwa nzila iwizile.’

30 Hezekia, nizakulongela chondachilawilile.

Mwaka uno na mwaka ukwiza mwizakuja ndiya haihandigwe na munhu yoyose.

Mbali muna umwaka weketatu mwizahanda na kugobola ndiya zenu.

Mwizahanda mizabibu na mwizakuja matunda yake.

31 Wanhu wa Yuda wondawasigale,

wezakongezeka fana viya mbiki viulava mazizi yake muna uulongo na kwima matunda yake.

32 Kwaviya wanhu wondawasigale wezalawa Yelusalemu,

na mabumbila ya wanhu wezaibanga kulawa kuna umulima Sayuni.

Mndewa Mulungu Yeli na Udahi kailunga kutenda ivo, kwaviya kana wivu.

33 Mndewa Mulungu kolonga vino kusonhela mfalume wa Ashulu,

‘Hezakwingila muna dibululu dino na hezapigisa misale.

Hezakwiza muna dibululu ijo na ngao,

hebu kuzele watowang'hondo wa kudizinga.

34 Nzila yondayezile niiyo yondayabwelele.’

Mndewa Mulungu kolonga ivo.

35 ‘Nizadigombela bululu dino na kudikombola,

kwa ichimu changu na kwa ichimu cha msang'hani wangu Daudi.’ "

36 Msenga wa Mndewa Mulungu kengila muna dilago da Waashulu na kawakoma wanhu 185,000. Wayawo viwalamke imitondo, wafika mitufi chila hanhu. 37 Maabaho Senakelibu mfalume wa Ashulu kasegela, kabwela Ninawi na kukala uko.

38 Siku dimwe Senakelibu viyakalile kotambika muna ikaye ya mulungu wake yotangigwa Nisiloki, Adalameleki na Shaleza wanage wamkoma na zele na wakimbilila Alalati. Mwanage imwenga yatangigwe Esalihadoni katawala hanhu hake.