1 Ulotezi usonhela bululu da Tilo.

Mweye wasang'hani muna zimeli zilawa Talishishi muwe na ndilo,

kwaviya bululu da Tilo dinangigwa na dilekigwa bila kaye na bila bandali.

Vimufikile isi ya Kitimu, muhulika mbuli iyo.

2 Mweye womukala mhwani, nyamaleni hupi.

Mtende matanga mweye wachuuzi wa bululu da Sidoni,

niiwawo wasang'hani muna zimeli wawatendile muwe matajili.

3 Wagenda muna zibahali nyingi kugala ndiya za Shiholi,

mavuno ya bawe da lwanda lwa Naili yakala faida ya bululu da Tilo.

Bululu ijo dikala gulilo da zisi.

4 Chinyala chako weye Sidoni, bululu dili na mhongono mumgwazo wa bahali.

Bahali yogong'onda, "Sinakuwa na usungu wa kuibasula na sinaibasula,

sinalela wana wa chilume hebu kulolesa goya wana wa chike."

5 Wamisili vondawahulike bululu da Tilo dimala kunangigwa,

wezakuwa na usungu ng'hani.

6 Lileni mweye wakaya wa mhwani,

iyoheni kukimbilila bululu da Talishishi.

7 Vino dino ijo bululu da kudeng'helela da Tilo,

bululu da umwaka ng'hani,

Niijo bululu da wakaya wahitile kukala zisi za kutali?

8 Vino yelihi yailungile mbuli zino kusonhela bululu da Tilo?

Bululu ijo dikala na wachuuzi wakalile na utajili,

iviya wachuuzi wake wakala wakulu,

wahishimigwe muna izisi zose.

9 Mndewa Mulungu Yeli na Udahi,

niiyo yailungile mbuli zino.

Katenda ivo muladi kuchimala chibuli chawo.

Iviya kawaguma chinyala wanhu wahishimigwe muna izisi zose.

10 Mweye wanhu wa bululu da Talishishi, limeni muna iisi yenu,

kwaviya habule bandali kaidi.

11 Mndewa Mulungu kaugolosa mkono wake kuna ibahali.

Kazitenda falume zitingisike kwa ludumbo,

kalagiliza mhongono za isi ya Kanaani zibomoligwe.

12 Kalonga, "Mweye wanhu wa bululu da Sidoni,

hamwizatenda dugila kaidi,

hata muhakimbilila kuna ichisiwa cha Kitimu, uko nako hamwizapata mhumulo."

13 Lola muna iisi ya Wakalidayo,

wanhu hawawoneka fana wabaho.

Waashulu waitenda isi iyo kuwa hanhu ha wanyama wa kumbago,

waizinga na malingo yawo ya ng'hondo,

wazibomola mhongono zake na wazileka bila chinhu,

waitenda isi kuwa tongo.

14 Mweye wasang'hani muna zimeli zilawa Talishishi mulile,

kwaviya mhongono yenu ibomoligwa.

15 Lusita ulwo bululu da Tilo dizazimizigwa kwa miyaka malongo saba, ulwo lusita lwa ugima wa mfalume. Mbali uhelelo wa miyaka iyo malongo saba, bululu da Tilo dizakuwa fana viwili wila wa malaya.

16 "Sola chinubi uhite kudibululu,

weye malaya kuzimizigwa,

towa chinubi vinogile,

imba nyila nyingi muladi ukumbukigwe."

17 Ihamala miyaka malongo saba, Mndewa Mulungu kezaleka kuwatagusa wanhu wa bululu da Tilo, nawo wezabwelela uchuuzi wawo na zisi zimwenga fana malaya viyoichuuza. 18 Mbali hela yondaipatike umo izakwikigwa hakwe kwa Mndewa Mulungu, haizakwikigwa ngama hebu kufisigwa. Hela izo zizasang'haniligwa kwa waja womsang'hanila haulongozi wa Mndewa Mulungu muladi wagule ndiya nyingi na mawalo yanogile.