1 Wamoabu wolonga, "Chimgalile mtawala wa isi wanang'hondolo wa ushulu,

chimgalile wanang'hondolo kulawa Sela muna dibwilingu,

mbaka kuna umulima Sayuni.

2 Fana ndege viwolawa muna zimvulu zawo,

niivo wanhu wa Moabu viwoloka iviloko va Alinoni."

3 Wamoabu wowalongela wanhu wa Yuda, "Chilongeleni mbuli ya kutenda,

muchikalize fana biki dili na mbeho muladi chihumule lusita lwa imisi.

Chifiseni cheye chiwingigwe.

4 Cheye chikale hamwe na mweye,

muchikalize na wanhu wochinanga."

Munhu yogaza kezasegela,

na magayo yezamala.

5 Munhu kulawa welesi wa Daudi na kezawatawala wanhu kwa uwaminika na kulonda,

kezatenda mbuli zinogile haulongozi wa Mulungu na kezahumiza voilondeka.

6 Wanhu wa Yuda wolonga, "Chihulika magoda ya wanhu wa Moabu,

chivimanya viwoigoda ng'hani,

chihulika magoda na ukewezi na utatali wawo,

mbali woigoda bule."

7 Sambi Wamoabu wolila,

woililila isi yawo.

Wotenda matanga kwaviya wakumbuka ndiya zinogile za Kili Halesesi.

8 Migunda ya Heshiboni inyala,

iviya mizabibu ya Sibima inyala,

watawala wa zisi waibojoga mizabibu inogile.

Umwaka ifika bululu da Yazeli na kwenela muna dibwilingu,

masukila yake yenela mbaka kuna ibahali.

9 Ivo nolila hamwe na Yazeli,

kwa ichimu cha mizabibu ya Sibima,

masozi yonilawa kwa ichimu chenu,

mweye mabululu ya Heshiboni na Eleale,

kwaviya ng'henze za kugobola ngano na matunda zihupika.

10 Kudeng'helela na kuseka kumala muna imigunda ya matunda.

Habule yoyose yokwimba muna imigunda ya mizabibu.

Habule kukama zabibu kaidi hana ihanhu ha kukamila zabibu.

Ng'henze zitowigwa lusita lwa kugobola zimala.

11 Ivo noililila isi ya Moabu fana chinubi,

na moyo wangu wodililila bululu da Kili Helesi.

12 Wanhu wa Moabu viwolawa kumtambikila mulungu wawo,

viwoiyoha kutambika kuna ichilima,

viwohita hanhu hawo helile ha kutambikila,

havizawafaya.

13 Mbuli ino Mndewa Mulungu kailonga kusonhela isi ya Moabu.

14 Mbali sambi Mndewa Mulungu kolonga, "Miyaka mitatu voipetigwa fana viya msang'hani viyopeta siku zake za kusang'hana, ukulu wa Moabu wizahunguka. Ingawa wanhu wake wengi, wondawasigale wagima wezakuwa wadodo na wanyondenyonde."