1 Mndewa Mulungu kolonga,

"One nimwing'ha chibuwa cha nyasa Yelusalemu mami yenu,

lelo chibuwa cha nyasa chakulihi?

One nimuuzani kuutumwa, kakulihi ija yonimchuuzile?

Mukumbuke kuwa muchuuzigwa kuutumwa kwa uhasanyi wenu,

mami yenu kawingigwa kwa mbuli zenu zihile zimtendile.

2 Lelo habali vinizile sifikile munhu?

Habali viniwatangile hamunidike?

Vino mkono wangu mguhi sidaha kuwalopoleni?

Vino niye, nabule nguvu ya kuwakombolani?

Lola, nihaikalikila bahali yonyala,

iviya nyanda nozitenda kuwa bwilingu,

somba weli umo wofa na wonung'ha vundo, kwaviya wapuwa mazi.

3 Niye nodigubika langa kwa ziza,

fana viya munhu yovala guniya kulagusa kuwa kamuna indilo."

4 Mndewa Mulungu kanifundiza chinhu cha kulonga,

muladi niwagume moyo waja walegele,

chila imitondo koning'ha hamu ya kutegeleza mbuli zoyolonda kunifundiza.

5 Mndewa Mulungu kagubula magutwi yangu,

na niye siulemile usenga wake,

na sibwelile kuchisogo.

6 Wanhu waja wanitowile,

niwalekela mgongo wangu,

na wanhu waja wang'olile ndevu zangu,

niwalekela makanza yangu.

Mbali viwanitowile na kunibwajulila mate, sichifile chihanga changu.

7 Mndewa Mulungu konitaza,

ivo sidaha kupata chinyala.

Niye nigangamala.

Novimanya kuwa sizapata chinyala.

8 Yonigombela kahabehi,

vino yelihi yoitowa na niye?

Yeze chime muna ichitala.

Vino, mwihi wangu yelihi?

Iyo yeme haulongozi wangu.

9 Lola Mndewa Mulungu konitaza.

Vino yelihi yodaha kulonga niye nihasanya?

Wehi wangu wose wezasakala fana walo na mhembele wezawagegeda.

10 Vino yelihi yomdumba Mndewa Mulungu?

Vino yelihi yozindilila mbuli za msang'hani wake?

Yeye yogenda muna diziza na kabule chitasa,

yamuhuwile Mndewa Mulungu na kumulolela yeye.

11 Mbali mweye mubwinha moto na moitendela mawenge,

mugende kwa bung'hulo da moto uwo,

milambi ya moto womuukong'hile mweye wenyewo.

Chondampate kulawa kwa Mndewa Mulungu niicho chino,

mweye mwizagaya ng'hani.