1 Ulotezi usonhela bwilingu dili habehi na bahali.

Fana vulavumbi vidibuma kulawa kusi,

niivo wehi viwokwiza kulawa kudibwilingu,

kulawa kuna iisi idumbiza.

2 Nilagusigwa malaguso ya kudumbiza,

wanhu wasede wotenda usede,

wananzi wonanga.

Mweye watowang'hondo wa Elamu hiteni mukaitowe ng'hondo,

mweye watowang'hondo wa Media dizingeni dibululu.

Mulungu kezayasegeza magayo yose yoyagaligwe na bululu da Babeli.

3 Kwa malaguso yayo nidumba ng'hani,

nipata usungu ng'hani fana usungu wa mwanamke yoibasula,

nidumba kwa mbuli inihulike,

na nyazanywa kwa mbuli iniwone.

4 Moyo wangu udinhila,

na nigudemeka kwa kudumba,

nilonda ichigulogulo chifike,

mbali vichifikile chinidumbiza.

5 Ndiya isasaligwa,

malili yatandikigwa,

wanhu waja na kung'wa.

Bahaja dizi dihulikika,

"Inukeni mweye watawala.

Sasaleni via va ng'hondo."

6 Mndewa Mulungu kanilongela,

"Hita ukeke mkalizi,

yalonge chila mbuli iyowona.

7 Yahawona bumbila da wakwelafalasi waidi waidi,

na wakwelangamia na wakwelamhunda,

yakale meso."

8 Maabaho mkalizi iyo kalandula dizi, kalonga,

"Mwenevale, imisi yose nima kuna dilingo da kukalizila,

nikaliza ichilo chose."

9 Lola bumbila dokwiza, wakwela falasi waidi waidi.

Wolonga, "Bululu da Babeli dihumigwa, dihumigwa ng'hani,

nyang'hiti zake zose za milungu zasigwa hasi na zibenigwa."

10 Mweye Waisilaili, wanhu wangu,

mweye mutwangigwe na kubetigwa fana ngano,

lelo nomulongelani mbuli zonizihulike kwa Mndewa Mulungu yeli na Udahi, Mulungu wa Isilaili.

11 Ulotezi usonhela isi ya Edomu.

Nihulika munhu konitanga kwa dizi kulu kulawa Edomu,

"Mkalizi, ichilo chomala zuwaki?

Kuna mbuli imwenga yoyose ichilo cha diyelo?"

12 Mkalizi kedika,

"Imitondo yokwiza na ichilo iviya yokwiza,

uhalonda kuuza kaidi, ubwele hamwande uuze."

13 Ulotezi usonhela isi ya Alabiya,

Mweye womuwapapiza mbahasha ngamia kulawa Dedani,

womukwika lago muna ichibago ya Alabiya,

14 mweye womukala muna iisi ya Tema, muweng'he mazi wanhu weli na ng'hilu,

muwagalile ndiya waja wogendagenda.

15 Kwaviya wakimbila zele,

mazele yanoligwe,

wakimbila mhinde zikwegigwe,

na wakimbila ng'hondo ng'hulu.

16 Ivo Mndewa Mulungu kanilongela, "Kwa lusita lwa mwaka umwe, bila kongezeka hebu kuhunguka, ukulu wose wa isi ya Kedali wizamala. 17 Wakwega mhinde hagati ya magalu wa wanhu wa Kedali niiwawo wadodo wondawasigale. Niye Mndewa Mulungu Nili na Udahi nilonga ivo."