1 Kezalawilila mfalume yondayatawale voilondeka,

vinyandama wake wezahumiza voilondeka.

2 Wawo wezakuwa fana hanhu ha kuikaliza na mbeho,

fana hanhu ha kuifisa lusita lwa mvula ng'hulu.

Wezakuwa fana vizanda va mazi muna iisi inyalile,

na fana sisila da luwe muna dibwilingu.

3 Meso ya wanhu wolola hayezafinya kaidi,

magutwi ya wanhu wohulika yezahulika.

4 Wanhu wotenda mbuli bila kugesa wezavimanya,

wanhu weli na vigagaziko wezalonga vinogile.

5 Wabozi hawezatangigwa kaidi wahishimigwa,

iviya wavwizi hawezatangigwa wahishimigwa.

6 Wabozi wolonga mbuli za chibozi,

wogesa kutenda mbuli zihile,

wotenda mbuli za kumuliga Mulungu,

na wokweneza uvwizi kusonhela Mndewa Mulungu.

Wowaleka wanhu weli na nzala bila ndiya,

na wowema mazi wanhu weli na ng'hilu.

7 Chiwotenda wavwizi chiha ng'hani,

na wotunga mbuli zihile,

wowadanganiza wachiwa kwa mbuli za uvwizi,

hata ngayengaye yahadai haki yake.

8 Mbali wanhu weli na hishima wotenda mbuli za hishima,

na wogombela mbuli za hishima.

9 Inukeni, mweye wanaake muhumule na munitegeleze,

mutegeleze mbuli zonilonga mweye wali womuilegehe.

10 Uhafosa mwaka umwe mwizagudemeka, mweye womuilegehe,

kwaviya hamwizapata mavuno yoyose,

mavuno ya mizabibu hayezakuwa baho.

11 Gudemekeni kwa kudumba, mweye wanaake womuilegehe,

gudemekeni kwa kudumba, mweye muli moyo hole.

Vuleni mawalo yenu na muvale maguniya.

12 Itoweni zimhambaga kwa usungu,

Ililileni migunda ikalile inogile,

ililileni mizabibu ikalile ihwatuke.

13 Ililileni isi ya wanhu wangu ikota miwa na mbigili,

zililileni kaye zose zimemile wanhu weli na seko na bululu dikalile na deng'ho.

14 Kwaviya kaye ya chifalume izalekigwa tongo,

bululu ijo da wanhu wengi dizalekigwa.

Mulima na lingo da ukalizi vizakuwa ukazi wa wanyama wa kumbago siku zose,

mhundambago wezafosa umo kwa deng'ho,

ng'hondolo wezapata ndiya yawo umo.

15 Mbali hamwande Mndewa Mulungu kezaching'ha muhe wake,

na bwilingu dizakuwa mgunda wili na ndiya.

Mgunda wili na ulongo unogile wizakuwa na ndiya nyingi.

16 Wanhu wezahumiza voilondeka muna dibwilingu,

mbuli zinogile zizatendeka muna umgunda wili na ndiya.

17 Kuhumiza voilondeka kwizawatenda wanhu wakale moyo hole,

kwizawatenda wailegehe na wakalizigwe siku zose.

18 Wanhu wangu wezakala hanhu heli na tindiwalo,

hanhu haholile.

19 Mbali mvula ya mabwe izatonya,

na kugwisigwa mibiki ya muna imbago,

na bululu dizadanganizigwa.

20 Mbali mwizamweda mweye muhanda mbeyu mumgwazo ya nzasa,

na mowalekela mhunda na ng'ombe wailegehe kuja mgina.