1 Lola, mkono wa Mndewa Mulungu siyo mguhi mbaka yapotwe kukukombola,

na gutwi jake hadipola mbaka dipotwe kuhulika.

2 Mbali uhasanyi wenu umtendani muwe kutali na Mulungu wenu,

uhasanyi wenu uchifisa chihanga chake,

muladi sekeyawone na sekeyahulike.

3 Kwaviya makono yenu yambula mwiko kwa kukoma,

iviya vidole venu vambula mwiko kwa mbuli zihile.

Milomo yenu yolonga uvwizi,

iviya milimi yenu yolonga mbuli zihile.

4 Habule munhu yogesa haki,

hebu yoigombela kwa ukweli.

Muhuwila mbuli muhala na molonga uvwizi.

Muilunga kudanganya na kutenda mbuli zihile.

5 Malungilo yenu yolumiza fana mafinga ya zoka dili na sumu,

kwaviya mazoka yeli na sumu yolawa muna yamafinga yayo.

Mowategela wanhu mtego fana viyotega buibui.

6 Malungilo yenu hayafaya fana viya walo viditendigwa na lutandabui,

wanhu hawadaha kuigubika.

Sang'hano zenu ziha,

sang'hano zenu za udugi.

7 Migulu yenu yokimbilila muna uhasanyi,

muhuha kuwakoma wanhu bila chimu.

Mogesa mbuli zihile,

hohose homuhita mobananga vinhu na mowatenda wanhu wagaye.

8 Mweye hamuimanyile nzila ya tindiwalo,

hamuzindilila malagilizo ya Mulungu.

Muitendela nzila ya ubozi,

munhu yoyose yofosa umo hapata tindiwalo.

9 Lekamana haki yakutali na cheye,

haki haifika kumwetu,

chihuwila kupata bung'hulo, mbali ziza muhala,

chihuwila kugenda muna dibung'hulo, mbali chogenda muna diziza.

10 Chobabasa muna ing'huta fana vipofu,

chobabasa muna zinzila zetu fana wanhu watulike yameso.

Imitondo choikwala fana lusita lwa ziza,

hagati ya wanhu weli na nguvu, cheye chilinga fana wanhu wadanganike.

11 Chotongoloma fana mnyama dubu,

cholila kwa giyogiyo fana huwa.

Chowinza haki, mbali habule haki,

chololela ukombola, mbali ukombola wakutali.

12 Kwaviya ubananzi wetu mwingi haulongozi wako,

iviya uhasanyi wetu wochilagusa.

Kwaviya ubananzi wetu wahamwe na cheye,

iviya wihi wetu choumanya.

13 Cheye chikulema na chikubela weye Mndewa Mulungu,

iviya chikuhinduka na chilema kukutegeleza weye Mulungu wetu.

Cholonga mbuli zihile na mbuli za kulema,

muna imizoyo yetu choilunga mbuli za uvwizi.

14 Wasemi hawahumiza voilondeka,

na wanhu hawatenda voilondeka.

Wanhu hawalonga ukweli hana iwanhu wengi,

wanhu wokwaminika wosegela.

15 Ukweli uhunguka ng'hani,

iviya munhu yoyose yoyepula na mbuli zihile kogaluka kuwa ukala.

Mndewa Mulungu kalola na kapata ludoko,

kwaviya wanhu hawahumiza voilondeka.

16 Kawona habule hata munhu imwe yogesa mbuli iyo,

kazanywa kuwa habule munhu yoyose yengilile.

Mbali mkono wake mwenyewo umgalila ukombola,

Lelo kasang'hanila udahi wake mwenyewo kuwakombola.

Haki yake mwenyewo imtaza.

17 Kavala haki fana viya walo da kuikimilila muna imhambaga,

iviya kavala pama fana ulopozi muna iditwi jake.

Kavala walo da kulihiza chisasi,

na kaifunga wivu fana joho.

18 Kezawatagusa wehi kwa mbuli iwatendile,

kezawawonela ludoko wehi wake na kuwalihiliza,

kezawatagusa wanhu wokala zisi zimwenga zili kutali.

19 Kwandusila ubanzi wa uswelo wa zuwa,

wanhu wezadidumba zina da Mndewa Mulungu,

na kwandusila ubanzi wa ulawilo wa zuwa, wanhu wezadihishimu zina jake.

Kwaviya Mndewa Mulungu kezakwiza fana lwanda lumemile mazi,

lwanda lusung'higwa kwa muhe wa Mndewa Mulungu.

20 Mulopozi kezakwiza Sayuni,

kwa wanhu wosama wa welesi wa Yakobo.

Mndewa Mulungu kolonga ivo.

21 Mndewa Mulungu kolonga,

"Nizatenda na mweye lagano dino,

Muhe wangu yokala hamwe na mweye, hezamulekani.

Mbuli zangu zonikile muna imilomo yenu,

zizakala muna imilomo yenu siku zose,

na zizasigala muna imilomo ya wanenu,

na muna imilomo ya welesi wenu,

kwandusila sambi na kugendelela."