1 Bwilingu na isi inyalile vizadeng'helela,

chuwala chizasekelela na kwalika maluwa.

2 Chuwala chizakwalika maluwa mengi,

chizasekelela na kwimba kwa kudeng'helela.

Chizakwing'higwa ukulu wa milima ya Lebanoni na unovu wa mulima Kalimeli na bawe da Shaloni.

Wanhu wose wezauwona ukulu wa Mndewa Mulungu, ukulu wa Mulungu wetu.

3 Gangamizeni makono yenu yabobile,

yagangamizeni mavindi yenu yabobile.

4 Walongeleni wafile moyo na wodumba,

"Imeni chilume, sekemudumbe.

Loleni, Mulungu wenu kokwiza kulihiliza chisasi,

kokwiza kuwatagusa wehi wenu,

iviya kezakwiza kumkombolani."

5 Baho vipofu wezawona kaidi na wasuwamagutwi wezahulika kaidi.

6 Mbetembete wezazumha fana mhala,

iviya mabubu wezakwimba kwa deng'ho.

Mazi yezakilima ng'hani muna ichuwala,

na muna ivizanda vili kudibwilingu.

7 Msanga wa usoma muna dibwilingu wizakuwa lamba da mazi,

isi inyalile izafakuka mazi.

Hanhu hawakalile mbwizi hezamema mazi na mibiki ya milanzi.

8 Umo mwizakuwa na kulugumbi dondaditangigwe "Nzila Yelile,"

wanhu wambule mwiko hawezafosa umo,

mbali wanhu wa Mulungu muhala.

Wabozi hawezakwaga muna inzila iyo.

9 Umo hamwizakuwa na simba,

na wanyama wakali hawezapatika,

mbali wanhu wakomboligwe niiwawo wondawafose.

10 Wakomboligwe na Mndewa Mulungu wezabwela Yelusalemu kuno wokwimba na kutowa ng'henze.

Wezabwela wosekelela lusita lose,

wezapata deng'ho na seko.

Luholozi na ndilo vizasegela kumwawo.