1 Mulungu kamwing'ha usenga Isaya mwana wa Amozi kusonhela isi ya Yuda na bululu da Yelusalemu.

2 Siku zikwiza mulima uli na kaye ya Mndewa Mulungu,

wizagangamizigwa kufosa milima yose,

wizakuwa mtali kufosa vilima vose,

wanhu wa zisi zose wezahita uko.

3 Wanhu wengi wezauhitila na kulonga,

izoni chikwele mulima wa Mndewa Mulungu,

chihite ukaye kwa Mulungu wa Yakobo.

Kezachifundiza viya vochilondeka kukala,

muladi chikale fana viyolonda Mndewa Mulungu.

Kwaviya lagilizo dizalawa Sayuni,

mbuli ya Mndewa Mulungu izalawa bululu da Yelusalemu.

4 Kezahumiza muna izisi zose,

kezalamula migomvi ya zisi nyingi.

Wanhu wezaponda yawo yawe magembe,

na migoha yawo iwe sengo za kukanhila mayani.

Isi haizaitowa,

iviya hawezaifunza kwiitowa ng'hondo kaidi.

5 Lelo mweye welesi wa Yakobo,

izoni mukale kwa kusondelela mafundizo ya Mndewa Mulungu.

6 Kwaviya Mndewa Mulungu kawalema wanhu wake.

Waja wotenda fana wahawi wolawa ubanzi wa ulawilo wa zuwa,

wolagula fana Wafilisiti,

woilumba na wamhazi.

7 Isi yawo imema mabwe ya hela na zahabu,

ngama yawo ng'hulu ng'hani,

isi yawo imema falasi,

matololi ya ng'hondo ya kubululigwa na falasi hayapeteka.

8 Isi yawo imema nyang'hiti za milungu ya uvwizi,

wanhu wake wotambikila vinhu viwatendile wenyewo,

vinhu viwalumbile wenyewo.

9 Chila munhu kezakugwa chinyala.

Weye Mulungu, sekeuwalekelele.

10 Ingileni muna yamatuka,

muhimbe mumsanga mukaifise,

muyepule na ludoko lwa Mndewa Mulungu,

mukaifise kutali na ukulu wake na bung'hulo jake.

11 Wanhu weli na magoda wezahumulusigwa,

udugi wa wanhu wizamala,

na Mndewa Mulungu yaidumwe kezatogozigwa siku iyo ikwiza.

12 Kweli siku ya Mndewa Mulungu Yeli na Udahi yokwiza,

Wose weli na magoda na waja wose woitogoza wezatagusigwa.

13 Kezakanha mibiki yose ya mielezi ya Lebanoni ili mitali na inogile,

na mibiki ya miyaloni yose ya isi ya Bashani.

14 Kezaipolomola milima yose mitali,

na vilima vose vitali.

15 Kezayabomola malingo yose yamatali,

na ng'huta zose za mhongono.

16 Kezazididimiza meli zose za Talishishi

na ngalawa zose zinogile.

17 Lusita lwizafika chila yoigoda kezainyendanyenda,

na udugi wa wanhu wizamala.

Mndewa Mulungu yaidumwe kezatogozigwa siku iyo.

18 Nyang'hiti za milungu zizakuwa zahabule.

19 Wanhu wezakwingila muna yamatuka na muna yamakombo

kwa kudumba ludoko lwa Mndewa Mulungu,

wezaifisa kutali na ukulu wake na bung'hulo jake,

vondayeze kuidumbiza isi.

20 Siku iyo wanhu wezawasila nyang'hiti zawo ng'hulumbe na magombalima,

nyang'hiti zawo za hela na zahabu zowaitendele muladi wazitambikile.

21 Nawo wezakwingila muna yamatuka yeli muna uluwe,

muna ulwatu lwa luwe,

kwa kudumba ludoko lwa Mndewa Mulungu,

wezakimbila kutali na ukulu wa bung'hulo jake,

vondayeze kuidumbiza isi.

22 Lekeni kumuhuwila munhu,

kwaviya kabule chochose mbali mhumuzi muhala muna imhula yake.

Vino munhu kofaya choni?