1 Siku ikwiza wila uno wizakwimbigwa muna iisi ya Yuda,

"Chinajo bululu dili na nguvu,

Mulungu kochikaliza fana ng'huta na mhongono.

2 Vuguleni zinyivi za bululu,

wanhu wotenda mbuli zinogile wengile,

wanhu wokwaminika.

3 Weye Mulungu kowakaliza muna ditindiwalo waja weli na moyo unogile,

kowakaliza kwaviya wokuhuwila.

4 Mumuhuwile Mndewa Mulungu siku zose,

kwaviya yeye niiyo luwe lwa siku zose.

5 Kawatenda wanhu wohishimigwa wainyendenyende,

kadigwisa hasi bululu kulu ng'hani,

na kajasa mumsanga.

6 Lelo bululu ijo dizabojogigwa na wanhu ngayengaye na dizabojogigwa na wanhu wowoneligwa."

7 Nzila za wanhu wotenda mbuli zinogile zigoloka,

weye Mulungu utenda goya,

koisasala nzila ya munhu yotenda mbuli zinogile.

8 Viuhumiza, chokugozela weye Mndewa Mulungu.

Cholonda ng'hani zina jako ditogozigwe.

9 Moyo wangu wokulonda lusita lwa ichilo,

muhe wangu wokulonda.

Lusita vondauwahumize wanhu wa ziisi zose,

wanhu wose wezaifunza kutenda mbuli zinogile.

10 Mbali wanhu wotenda mbuli zihile wahatendeligwa mbuli zinogile,

hawaifunza kutenda mbuli zinogile.

Hata wahakala muna iisi ya haki,

wogendelela kuwonela,

na hawahishimu ukulu wa Mulungu.

11 Weye Mndewa Mulungu, kwinula mkono wako kuwatagusa,

mbali wawo hawauwona.

Wanhu wotenda mbuli zihile walole viuwalonda ng'hani wanhu wako,

muladi wagumigwe chinyala.

Moto wizawatimbula wehi wako.

12 Weye Mndewa Mulungu kuching'ha tindiwalo,

kuchitenda chidahe kusang'hana mbuli zetu zose.

13 Weye Mulungu, Mulungu wetu,

chilangulizigwa na wandewa wamwenga,

mbali siyo weye,

lelo chotogola kuwa weye muhala niiyo Mulungu wetu.

14 Wanhu wawo wadanganika na hawezakuwa wagima kaidi, wagaluka mizimu na hawezazilibuka.

Kwaviya weye kuwatagusa na kuwakoma,

habule yondayawakumbuke kaidi.

15 Weye Mndewa Mulungu kuyongeza isi yetu,

kuitogoza mwenyewo na kutagamula mhaka zose za isi.

16 Weye Mndewa Mulungu vichigaiye chikuzahila,

viuchitaguse chikupula uchitaze.

17 Fana mwanamke yolumwa usungu,

viyotugutila mawine yeli nayo,

niivo vichikalile kuulongozi wako weye Mndewa Mulungu.

18 Cheye chipata mawine ya kulela,

mbali chilela mbeho muhala.

Hachitendile chinhu chochose cha kuikombola isi yetu,

iviya hachidahile kongeza peta ya wanhu muna iisi.

19 Wanhu wako wadanganike wezakuwa wagima,

na mitufi yawo izazilibuka.

Wagonile muna dileme wezalamka na kwimba nyila za kudeng'helela.

Mulungu kezagala nhungwe igala ugima,

wanhu weli kuzimu wezalawa wagima.

20 Mweye wayangu izoni mwingile muna iviheleto venu,

muihindile umo na muifise kwa lusita luguhi,

mbaka ludoko lwa Mndewa Mulungu vondalumale.

21 Lola, Mndewa Mulungu kokwiza kulawa hanhu hake,

muladi kuwatagusa wanhu wa isi kwa uhasanyi wawo,

isi haizawafisa waja wakomigwe,

mbali izawalagusa.