1 Siku zikwiza wanaake saba wezamuhitila mulume imwe na kumulongela,

"Ndiya na mawalo chizazahila wenyewo,

mbali uchisegezele chinyala chetu na uchisole."

2 Siku zikwiza tambi da Mndewa Mulungu dondadisuke dizanoga ng'hani na kutogozigwa, nayo matunda ya isi yezanogeza. Waisilaili wasigale wezatogoligwa na kuigodela isi viikwima ndiya. 3 Waja wasigale wagima kuna dibululu da Yelusalemu, lusita Yelusalemu viinangigwe wezatangigwa welile. 4 Mndewa Mulungu kezawasafya wanhu wa Yelusalemu muladi kusegeza damu itike umo kwa makono yawo. Kezatenda ivo kwa kuhumiza na kutagusa. 5 Maabaho kezatenda chila hanhu uchanyha ya mulima Sayuni na uchanyha ya wanhu woiting'hana uko, hawe na wingu da yosi lusita lwa imisi na moto wokwaka lusita lwa ichilo. Iviya bung'hulo da Mulungu dizatanda na kudikaliza bululu jose. 6 Bung'hulo jake dizakuwa chiheha cha kuwakaliza na vuke da imisi, iviya dizakuwa hanhu ha kukimbilila lusita lwa mvula nyingi.