1 "Guta nyangi na sekeuleke,

landula dizi jako fana mhalati.

Wagong'ondele wanhu wangu kubiduka kwawo,

walongele welesi wa Yakobo uhasanyi wawo.

2 Kwaviya chila siku wonizahila,

wowoneka wolonda kuzimanya nhendelo zangu,

fana viya wawo wotenda mbuli zinogile,

hawalekile malagilizo ya Mulungu wawo.

Wolonda Mulungu yawahumize voilondeka,

wodeng'helela kumkwenhukila Mulungu.

3 Wawo wolonga, ‘Habali cheye chifunga kuja mbali weye hulola?

Habali choinyendanyenda mbali weye hulola?’

"Siku yenu ya kufunga kuja motenda vomulonda mweye,

kuno mowabamanya wanhu wosang'hana kumwenu.

4 Lola mofunga kuja kuno mogomba na kuitowa,

moitowa ng'honde.

Muhafunga kuja fana ivo,

muvimanye kuwa mbuli zimupula hazizafika kumwangu.

5 Vino nisagula kufunga kuja kulingile ivo?

Vino nisagula siku imwe muhala ya munhu kuinyendanyenda?

Iviya mogonela mawalo ya maguniya na moibuga maivu.

Kutenda ivo mokutanga kufunga kuja?

Vino ino iyo siku itogoligwa na Mndewa Mulungu?

6 Niye nolonda mufunge kuja fana vino,

muwafungule wanhu wafungigwe kwa kuwoneligwa,

mufungule nzabi za utumwa,

muwalekelele wailegehe wowoniligwa,

mubene vinhu vose va chitumwa.

7 Kufunga kuja kwa kweli ni kuwagolela weli na nzala ndiya zenu,

kuweng'ha hanhu ha kukala ngayengaye welibule,

kuweng'ha mawalo wanhu welibule mawalo,

sekemuleke kuwataza wakaya wayenu.

8 Muhatenda ivo mwizanang'hana fana bung'hulo,

mwizahona himahima,

Mndewa Mulungu yeli na haki kezamulongolelani,

kezamkalizani kulawa kuchisogo kwa ukulu wake.

9 Baho mwizampula Mulungu, nayo kezamwidikani,

mwizalila yamtazeni,

nayo kezalonga, ‘Nabaha.’

"One muhasegeza vinhu va chitumwa,

muhaleka kuwazeha wamwenga na kulonga mbuli zihile,

10 muhaweng'ha ndiya wanhu weli na nzala,

muhakomeleza chowolonda weli na nzala,

bung'hulo dowamwemwesela lusita lwa ziza,

ichilo yenu izakuwa fana imisi.

11 Mndewa Mulungu, kezamulongozani siku zose,

kezamwing'hani chimulonda lusita lwa zuwa.

Kezamgangamizani ng'huli zenu,

iviya mwizakuwa fana chizi chitiligwe mazi,

fana nzasa ya mazi haiyanyala.

12 Wanhu wenu wezazenga hanhu hakalile matongo,

wezazenga kaidi vandusilo,

mweye mwizatangigwa, ‘Wene kuzenga kaidi ng'huta zibomoke,’

iviya ‘Wene kubweleza kulugumbi da kukala.’

13 One uhaleka kutenda sang'hano zihile siku ya mhumulo,

one uhaleka kutenda mbuli zihile siku yangu yelile,

one uhaitanga siku ya mhumulo siku ya kudeng'helela,

one uhaihishimu siku iyo yelile ya Mndewa Mulungu,

one uhaihishimu kwa kuleka kutenda mbuli zako mwenyewo,

one uhaleka kulonga mbuli zako mwenyewo,

14 Niye Mndewa Mulungu nizakutenda udeng'helele,

nizakutenda uhume mbuli ndala zose muna iisi,

nizakwing'ha isi inimwing'hile wasaho yako Yakobo."

Mndewa Mulungu kolonga ivo.