1 Mndewa Mulungu, Mulungu Yeli na Udahi,

kezasegezela wanhu wa bululu da Yelusalemu na isi ya Yuda vinhu vose viwohuwila,

kowasegezela ndiya na mazi.

2 Kezamsegeza munhu galu na mtowang'hondo,

msemi na mulotezi na mulaguzi na mkulu,

3 kezamsegeza mkulu wa watowang'hondo wa wanhu malongo matano na munhu yamanyike,

kezamsegeza chinyandama na galu wa kutenda vinhu na galu wa uganga.

4 Mulungu kalonga, "Nizaweka wabwanga kuwa walangulizi na wana ving'hele wezatawala."

5 Wanhu wezaiwonela wawo kwa wawo,

chila munhu kezamuwonela miyage,

mkaya kezamuwonela mkaya miyage,

mbwanga kezamuliga mulala,

yokwehuligwa kezamwehula munhu yohishimigwa.

6 Lusita ulwo munhu kezamulongela ndugu yake muna ikaye ya tati yawo,

"Weye kuna walo da sambi, uwe mkulu wetu,

weye uchitawale lusita luno lwa magayo."

7 Mbali siku iyo kezamwidika,

"Niye sidaha kukutaza,

kwaviya nabule ndiya hebu walo muna ikaye yangu.

Ivo sekeunisagule kuwa mtawala wako."

8 Wanhu wa bululu da Yelusalemu waikwala,

wanhu wa isi ya Yuda wagwa,

kwaviya wamulema Mndewa Mulungu kwa mbuli zawo na sang'hano zawo,

wokwehula ukulu wake.

9 Vihanga vawo volagusa uhasanyi wawo,

woigodela uhasanyi wawo fana viya wanhu wa bululu da Sodoma,

iviya hawaufisa.

Wanhu wawo wezagaya,

kwaviya waigalila magayo wawo wenyewo.

10 Walongeleni wanhu wotenda mbuli zinogile kuwa wezatemeligwa mate kwa sang'hano zawo ziwasang'hane.

11 Wanhu wose wotenda mbuli zihile wezagaya ng'hani,

wezalihigwa kwa chiya chowawatendele wanhu wamwenga.

12 Mndewa Mulungu kolonga, "Wabwanga wowagaza wanhu wangu,

na wanaake wowatawala wanhu wangu.

Mweye wanhu wangu, wakulu wenu womwagizani,

na hawawalagusa nzila yomulondeka kuisondelela."

13 Mndewa Mulungu kaisasala kulamula,

kokwima kuwahumiza wanhu wake.

14 Mndewa Mulungu kowahumiza wakulu na walangulizi wa wanhu wake,

"Mweye muwakang'ana wanhu wangu fana mgunda wa mizabibu,

vinhu viwahokigwe ngayengaye vamuna zikaye zenu.

15 Vino fambulo jake choni kuwagaza wanhu wangu na kuwatendela usede wanhu ngayengaye?

Niye Mndewa Mulungu nili na Udahi nouza ivo."

16 Mndewa Mulungu kolonga, "Wanaake wa Yelusalemu wana magoda,

viwogenda wokwinula matwi yawo,

wolembula meso yawo,

kuno wogenda woigoda,

na vitindi vawo volila muna yamagulu yawo.

17 Lelo niye Mndewa Mulungu nizawatagusa wanaake wa Sayuni kwa kuwawegula nyele,

na kuwahambula walo da kugubika maungo yawo muladi kuwaguma chinyala."

18 Siku zikwiza Mndewa Mulungu kezawahambula vitindi na mikufu na vigogela wanaake wa Yelusalemu. 19 Kezawahambula heleni na bangili na vilemba, 20 na vitindi vibotigwe muna yamagulu na mikwiji na nyhupa za mavuta yonung'hila goya na mhinga, 21 na mhete za vidole na vipini va muimhula, 22 na mawalo ya madugila na ng'hanzu na vilemba na mifuko ya hela, 23 na walo dinogile na kombelo na usalu na shela.

24 Hanhu honung'hila hezalava vundo,

hanhu ha kuvaligwa mikwiji hezavaligwa nzabi,

hanhu ha nyele zitendigwe goya hezaweguligwa,

hanhu ha kuvala mawalo yanogile hezavaligwa maguniya,

vihanga vawo vihambigwe vizakuwa va chakachaka.

25 Walume wenu wezakomigwa na,

iviya wanhu wenu magalu wezadanganika kuna ing'hondo.

26 Maabaho wanhu wezalila kwa usungu hana ulwivi lukulu lwa bululu.

Nawo wezabimbilika muna yamatimbwisi kuno wabule chinhu.