1 Kwizagaya weye unanga bila kunangigwa,

kwizagaya weye ubiduka bila kubidukigwa.

Uhamala kudanganiza,

na weye kwizadanganizigwa.

Uhamala kubiduka,

na weye kwizabidukigwa.

2 Weye Mndewa Mulungu, uchiwonele ubazi,

chokuhuwila weye.

Uching'he nguvu chila siku,

uchilopole lusita lwa magayo.

3 Uhaduma wanhu wokimbila,

uhenuka, wanhu wa zisi zimwenga woimwaga.

4 Wehi wawo wowateka,

fana nzige viwoja.

5 Mndewa Mulungu mkulu wa chila chinhu,

kokala kuchanyha kuulanga,

kawatenda wanhu wa bululu da Sayuni watende voilondeka na wawe waminika.

6 Mweye wanhu wa Yelusalemu,

Mndewa Mulungu kezamwikani goya,

kezamulopolani kwa kumwing'hani ubala na kuvimanya.

Kumdumba Mulungu kwizalinga fana chinhu cha hela nyingi kumwenu.

7 Lola wanhu magalu wolila muna dikulugumbi,

wasenga wa tindiwalo wolila kwa usungu.

8 Makulugumbi yasigala yabule chinhu,

habule yogenda umo.

Malagano yobenigwa,

wakalangama wozehigwa,

habule munhu yoyose yohishimigwa.

9 Isi inyala na haidaha kwima ndiya,

mbago za Lebanoni zinyala,

bawe dinogile da Shaloni diwa bwilingu.

Mibiki ili kuna dibawe da Bashani na mulima wa Kalimeli yopaganhika mayani.

10 Mndewa Mulungu kolonga,

"Lelo nizakwinuka na nizalagusa udahi wangu,

na nizaitogoza.

11 Malungilo yenu yose yalinga fana makang'ha,

chiya chondachilawilile choguma unyolodo,

mhumuzi yenu ilinga fana moto wondaumtimbuleni.

12 Wanhu wa zisi zimwenga wezatimbuligwa,

fana miwa viitimbuligwa muna umoto.

13 Mweye muli kutali, tegelezeni mbuli zonizitendile,

mweye muli habehi togoleni udahi wangu."

14 Wahasanyi muna dibululu da Sayuni wodumba,

wanhu hawamuhuwila Mulungu wogudema na wolonga,

"Vino yelihi yodaha kufunyila umoyo moto uno ukwaka?

Vino yelihi yodaha kukala na moto uwo ulunguza siku zose?"

15 Wanhu wowokala voilondeka na wogolosa zimbuli,

waja wowokwehula utajili wa kuhoka,

na wowolema kuhokela lushwa,

na hawatogola kuhulika malungilo ya kukoma,

iviya hawatogola meso yawo yalole mbuli zihile,

16 wanhu wawo wezakala hanhu haholile,

hanhu hanogile heli na mhongono na luwe,

wezakwing'higwa ndiya zawo siku zose,

na mazi yawo ya kung'wa.

17 Meso yenu yezamuwona mfalume muna viyonogeza,

mwizaiwona isi ng'hulu iyotawala.

18 Mwizakumbuka vimudumbile na mwizaiuzagiza,

"Vino wakulu wa Ashulu wakulihi?

Vino wakulihi waja vinyandama wasolile kodi?

Vino wakulihi vinyandama wokwimiliza ya malingo?"

19 Hamwizawawona kaidi wanhu waja wadugi,

wowolonga ulonzi wa chigeni.

20 Loleni mulima Sayuni kochitenda madugila yetu,

uko kuna dibululu da Yelusalemu,

ukazi wenu uholile, hema digangamale,

nzabi zake hazizakanhigwa hata imwe.

21 Uko Mndewa Mulungu kezalagusa ukulu wake,

kwizakuwa na lwanda na vizanda,

umo meli za ng'hondo hazizafosa,

na meli ng'hulu hazingila.

22 Kwaviya Mndewa Mulungu msemi wetu,

iyo yoching'ha malagilizo,

Mndewa Mulungu niiyo mfalume wetu,

na yochikombola.

23 Nzabi za meli za wehi zotohoka,

haidahika kwamhilila matanga yake hebu kuyanzanza.

Vinhu viwasolile vizagoligwa,

mbaka vilema wodaha kusola hanhu hawo.

24 Habule mkaya wa Sayuni yondayalonge kaidi, "Niye mtamu."

Wanhu wokala umo wezalekelelwa wihi wawo.