1 Dizagaya bululu da Samalia, diwa fana kombelo uchanyha ya kolongo kuna uulongo unogile.

Wanhu wokoligwa wa isi ya Isilaili woigodela kombelo ijo,

mbali hishima yake izamala fana luwa vidinyala.

2 Mndewa Mulungu kaisagulila munhu galu na yeli na nguvu,

iyo kalinga fana mvula ya mabwe na vulavumbi kulu

fana mazi mengi ng'hani yokilima,

kwa mkono wake kezawasa hasi.

3 Kombelo da magoda da wanhu wokoligwa wa Isilaili dizabojogigwa.

4 Hishima yake izasegela fana luwa vidinyala,

ukulu uwatawala kuna dikolongo dili na ulongo unogile,

wizakuwa fana nhini za mwanduso lusita lwa mavuno,

wanhu wahaziwona wozaha na kuzija bahobaho.

5 Siku zikwiza Mndewa Mulungu Yeli na Udahi kezakuwa kombelo da hishima,

fana chilemba chinogile kwa wanhu wake wosigala.

6 Kezawalongoza wasemi kuhumiza voilondeka,

na kezaweng'ha nguvu wakalizi wa bululu.

7 Wanhu wamwenga wakoligwe divai,

na kuzazalika kwa ichimu cha kukoligwa upele,

wakulu wa nhambiko na walotezi wozazalika kwa ichimu cha upele na wakoligwa divai.

Walotezi wawo waga,

woikwala muna ukuhumiza.

8 Meza zose zimema madesi na unyolodo,

habule hanhu helile.

9 Wawo wonizeha na wouza,

"Vino mulotezi ino kolonda yamfundize yelihi?

Vino kogesa kezachilongela cheye usenga wake?

Vino kezachilongela cheye ving'hele vilekile kong'ha?"

10 Kochifundiza fana wana ving'hele,

malagilizo yahamala malagilizo, msitali na msitali,

lusita chino lusita chiya.

11 Lelo Mndewa Mulungu kezalonga na wanhu wawo kufosela wageni,

na kwa ulonzi mgeni.

12 Yeye kawalongela,

"Nizamwing'hani mhumulo.

Mweye mulegele nizamtendani muhumule.

Hano hanhu ha mhumulo."

Mbali wawo walema kumtegeleza.

13 Ivo mbuli ya Mndewa Mulungu izakuwa ivo,

malagilizo yahamala malagilizo, msitali na msitali,

lusita chino lusita chiya.

Wawo wahagenda wezaikwala,

wezabeneka na wezanamatigwa na wezagwiligwa.

14 Lelo mtegeleze mbuli ilawa kwa Mndewa Mulungu,

mweye muzehaji, womuwatawala wanhu wa Yelusalemu.

15 Mweye womuigoda mwika lagano na ifa,

mutenda lagano na kuzimu.

Mweye molonga mwila haumpatani,

kwaviya mohuwila uvwizi,

na moutenda uvwizi kuwa kimbililo jenu.

16 Mndewa Mulungu kolonga,

"Lola nizakwika dibwe muna dibululu da Sayuni,

dibwe da chandusilo,

dibwe ditogile da bei ng'hulu.

Munhu yodihuwila hezadumba.

17 Nizaitenda haki kuwa luzabi lwa kulingila,

na kutenda mbuli zinogile kuwa timazi.

Mvula ya mabwe izausegeza uvwizi wenu womukimbilila,

mazi yezamema hanhu henu ha kuifisa.

18 Lagano jenu na ifa dizabenigwa,

iviya lagano domutendile na kuzimu dizasegezigwa.

Hulo kulu vondadize dizamgazani.

19 Chila lusita vondadize dizawakumba,

najo dizafosa chila imitondo na imisi na ichilo.

Dizakwandusila mwanduso mbaka uhelelo."

Kuumanya usenga uno kogala kudumba ng'hani.

20 Kwaviya mweye mwizakuwa fana munhu yogona muna dikomwa bimhi hadaha kuigolosa,

na mgolole mguhi haufaya kuigubika.

21 Kwaviya Mndewa Mulungu kezakwima fana viyemile kuna umulima wa Pelasimu,

kezawona ludoko fana viyawonile kuna dikolongo da Gibeoni.

Kezafikiza sang'hano yake ya kuwatagusa.

22 Lelo lekeni kuzeha,

buleivo minyololo yenu izatoga ng'hani,

kwaviya Mndewa Mulungu Yeli na Udahi kanilongela kuwa kailunga kuitimbula isi yose.

23 Kingeni digutwi mutegeleze chinilonga,

mutegeleze vinogile mbuli zangu.

24 Vino mulimi yolonda kuhanda mbeyu kogendelela kulima lusita lose?

Vino kogendelela kuhimbula na kutulatula madongo?

25 Yahakomeleza kulima mgunda wake,

kohanda mbeyu za binzali na binzali sisili,

kohanda ngano hanhu hake na shayili hanhu hake,

na kohanda uhemba hanhu hake.

26 Kwaviya Mulungu wake komulongela na komfunza viyolondeka kumsang'hanila.

27 Ng'hunde hazihwagigwa kwa chiya chikutwa,

iviya mbeyu za viungo hazihululigwa kwa tololi,

mbali ng'hunde zohwagigwa kwa biki na mbeyu za vilungo kwa fimbo.

28 Munhu yolima kodunda ngano yake,

hagendelela kuhwaga lusita lose.

Kavimanya kuhwaga na taili da tololi da kuhwagila uchanyha yake, mbali haidunda.

29 Udahi uno wolawa kwa Mndewa Mulungu Yeli na Udahi.

Malungilo yake yokwazanya,

iviya ubala wake wafosa ubala wa wanhu wose.