1 Mndewa Mulungu kolonga,

"Munitegeleze mweye womulonda haki,

mweye womunizahila.

Muloleni Ibulahimu yakalile fana luwe luja womusongoligwe.

2 Mkumbukeni Bulahimu wasaho yenu na Sala yonimwing'hile welesi.

Bulahimu kakala kabule wana lusita vinimtangile,

mbali nimtemela mate na nimwing'ha welesi mwingi.

3 Kweli Mndewa Mulungu kezawaguma moyo wanhu wa bululu da Sayuni,

kezayawonela ubazi matongo yake,

kezaditenda bwilingu jake diwe fana mgunda wa Edeni,

na chuwala chake fana chizi cha Mndewa Mulungu.

Umo wanhu wezadeng'helela na kutowa ng'henze,

na nyila za kumwing'ha hewela Mulungu zizahulikika umo.

4 "Nitegelezeni mweye wanhu wangu,

kingeni digutwi mweye wanhu wangu.

Malagilizo na haki volawa kumwangu,

ivo vizakuwa bung'hulo kwa zisi.

5 Nizakwiza himahima kuwakombola,

lusita lwangu lwa kuhuma lwahabehi.

Niye mwenyewo nizazitawala zisi.

Wakaya wa zisi za kutali wonigozela niye,

wohuwila niwataze.

6 Mwinule meso yenu mulole kuulanga,

loleni isi uko hasi.

Ulanga wizakwaga fana yosi,

isi izasakala fana walo,

iviya wakaya wake wezadanganika fana wang'onyo.

Mbali ukombola wondaniugale wizakala siku zose,

utawala wangu wa haki hawizamala.

7 "Kingeni digutwi mweye womuvimanya kutenda mbuli zinogile,

mweye mwikile malagilizo yangu muna imizoyo yenu.

Sekemdumbe wanhu wahamwehulani,

na sekemuwe na lugano vondawamdununzeni.

8 Kwaviya wawo wezadigwa na mhalata fana viya walo,

kupatu wezawaja fana viwoja mazoya ya ng'hondolo,

mbali haki yangu izakala siku zose,

ukombola wangu hawizakuwa na uhelelo."

9 Weye Mndewa Mulungu, lamuka uchitaze kwa nguvu yako,

fana viutendile umwaka.

Vino siyo weye udikanhile ng'onyo dikulu ditangigwa Lahabu,

na kuditula zoka ijo dikulu da kudumbiza?

10 Weye iyo uinyazile bahali,

iyo utendile nzila muna ibahali,

muladi waja wouwalopole wafose umo.

11 Wanhu wouwakombole weye Mndewa Mulungu wezabwela,

wezakwiza Sayuni kuno wokwimba.

Wezamema deng'ho siku zose,

wezasekelela na kwimba.

Wanhu hawezakuwa na manhesa na hawezakuwa na usungu kaidi.

12 Mndewa Mulungu kolonga,

"Niye kweli iyo niwaguma moyo.

Vino mweye momdumba munhu yodanganika,

munhu yeli fana mayani?

13 Mweye monizimiza niye Mndewa Mulungu, Mulungu wenu,

yonyanzaze ulanga,

yonikile vandusilo va isi.

Lelo modumba siku zose,

kwa ichimu cha ludoko lwa mwihi wenu,

iyo kailungila kuwananga.

Vino ludoko lwake lwizafika kulihi?

14 Wafungwa wezalekelelwa himahima,

hawezadanganika na kuhumuluka muna dileme,

hebu hawezapuwa ndiya.

15 Niye Mndewa Mulungu, Mulungu wenu,

noitibula bahali muladi beho jake dibume.

Mndewa Mulungu Yeli na Udahi ijo zina jangu.

16 Nizika mbuli zangu muna imilomo yenu,

na kuwagubika kwa mkono wangu.

Niwanzanza ulanga,

na nika vandusilo va isi,

nowalongela mweye wanhu wa Sayuni,

‘Mweye mwa wanhu wangu.’ "

17 Lamka weye Yelusalemu,

Lamka weye ugonile,

Mndewa Mulungu kakung'wiza chihamha cha ludoko,

weye kung'wa lusikasika mbaka kuzazalika.

18 Muna iwana wose wouweleke,

habule hata imwe wa kukutawala.

Habule mwanago yoyose youmweleke yondayakwamhe mkono kukulongoza.

19 Mahulo maidi maidi yakupata,

kunanga na kudanganiza,

na nzala na ndilo.

Vino yelihi yondayakuwonele ubazi?

20 Wanago wasinduka,

wagona mumgwazo wa makulugumbi,

fana mhala yenzeke muna ulwavu.

Mndewa Mulungu kawawonela ludoko,

Mndewa Mulungu kawakalikila,

Mulungu wako kawatagusa.

21 Lelo tegeleza weye Yelusalemu yougaya,

tegeleza weye ukoligwe,

mbali siyo kwa divai.

22 Mndewa Mulungu, Mulungu wako yowagombela wanhu wake kolonga,

"Nikusegezela chihama chikutenda uzazalike,

hwizakung'wa kaidi chihama cha ludoko lwangu.

23 Chihama icho nizaweng'ha wanhu wokugaza,

waja wakulongele ugone hasi wafose uchanyha,

wautenda mgongo wako fana ulongo,

fana nzila yawo ya kufosa."