1 Muhavu uhatulile ulanga uhumuluke,

milima igudemeke kwa kukudumba.

2 Humuluka ukawatende wehi wako waziwone nguvu zako,

muladi wanhu wa zisi zimwenga wagudemeke kwa kudumba,

fana moto viutimbula ngodi na kutenda mazi yakimule.

3 Viutendile mbuli za kudumbiza hachizihuwile,

kuhumuluka na milima igudemeka kuulongozi wako.

4 Kwandusila umwaka habule munhu yadahile kuhulika kwa magutwi yake,

na habule munhu yamuwonile mulungu yoyose yalingile weye.

Weye kutenda mbuli zilingile izo kwa ichimu cha wanhu womuhuwila weye.

5 Weye kokwiza kuwataza wanhu wotenda voilondeka kwa kudeng'helela,

wanhu waja wozindilila malagilizo yako.

Vichihasanye kuchiwonela ludoko,

lelo chizakomboligwa vilihi?

6 Cheye wose chiwa fana wanhu wafilile,

sang'hano zetu zose zinogile zilinga fana mawalo yambule mwiko.

Wose chonyala fana mayani,

wihi wetu wochihembelusa,

fana mayani viyohembelusigwa na vulavumbi.

7 Habule munhu yoyose yokwiza kukupula,

habule yoiyoha kuzindilila malagilizo yako.

Kwaviya weye kuchifisa chihanga chako,

kuchileka chifungigwe na mbuli zihile zochitendile.

8 Mbali weye Mndewa Mulungu, weye niiyo Tati yetu,

cheye ulongo,

weye niiyo muumbaji,

cheye chose kuchiumba weye.

9 Weye Mndewa Mulungu, sekeuchiwonele ludoko ng'hani,

sekeukumbuke uhasanyi wetu siku zose.

Ukumbuke kuwa cheye chose wanhu wako.

10 Mabululu yako yelile yawa mabwilingu,

Sayuni iwa matongo,

bululu da Yelusalemu ditimbuligwa na moto.

11 Kaye yako yelile iviya inoga, muja mowakutambikile wasaho zetu,

itimbuligwa na moto.

Vinhu vetu vose vinogile vibanangika.

12 Vino kwa mbuli izo zose kwizaikimilila sekeutende chinhu?

Vino weye Mndewa Mulungu kwizagendelela kunyamala na kuchitagusa?