1 Tegelezeni mweye wanhu wa Yakobo,

mweye womutangigwa kwa zina Isilaili,

mweye welesi wa Yuda.

Mweye moilaha kwa zina da Mndewa Mulungu,

mweye mopula kwa zina da Mulungu wa Isilaili,

mbali momkeweza.

2 Mweye womuitanga wanhu wa bululu jelile,

molonga momuhuwila Mulungu wa Isilaili,

Mndewa Mulungu Yeli na Udahi niijo zina jake.

3 Nigong'onda mbuli za mwanduso, kwandusila umwaka,

nizigong'onda niye mwenyewo,

iviya nizitenda zimanyike kumwenu.

Bahobaho nizitenda na zilawilila.

4 Mbali mweye niwamanya vimuli,

mizoyo yenu midala,

molema kutegeleza.

5 Ivo niwagong'ondela mbuli kwandusila umwaka,

zing'hali mbuli zino hazinalawilila,

muladi sekemwize kulonga nyang'hiti zenu za milungu izo zitendile mbuli izo.

6 Mweye muzihulika na muziwona mbuli zose.

Vino habali humzitogola?

Kwandusila sambi nizawalongela mbuli za sambi,

mbuli ziya zifisigwe hamzimanyile mbee.

7 Mbuli izo zilawilila diyelo,

hamuzihulike umwaka.

Lelo hamudaha kulonga, "Ona chizimanya mwaka."

8 Hamuzihulike na hamuzimanyile,

kwandusila umwaka magutwi yenu hayahulike.

Nivimanya kuwa mweye wavwizi,

momanyika molema kutegeleza kwandusila umwaka.

9 Kwa hishima ya zina jangu,

nizaleka kumuwonelani ludoko,

nizaikimilila sekenimnangeni.

10 Nimsafyani, mbali siyo fana hela muna umoto,

nimgezani muna umoto wa manhesa.

11 Nizatenda ivo kwa ichimu changu mwenyewo,

Vino habali nidileke zina jangu jehuligwe?

Sizamwing'ha ukulu wangu munhu imwenga.

12 Munitegeleze mweye welesi wa Yakobo, munitegeleze mweye Waisilaili woniwatangile.

Niye iyo wa mwanduso na uhelelo.

13 Mkono wangu mwenyewo wika chandusilo cha isi,

iviya mkono wangu wa kulume uwanzanza ulanga,

na nihaitanga, isi na langa vokwima haulongozi wangu.

14 "Iduganyeni mose munitegeleze.

Yelihi muna imilungu yenu yondayalole vinhu vino?

Ija yolondigwa na Mndewa Mulungu kezafikiza mbuli ziya Mulungu ziyalondile kwa Babeli,

yeye kezawatowa Wababeli.

15 Ona, niye nilonga na nimtanga,

nimgala nayo kezafikiza lungilo jake.

16 Izoni habehi na niye, muhulike mbuli ino.

Kwandusila mwanduso nilonga,

‘Mbuli izo vizanduse, niye nikala baho.’ "

Lelo Mndewa Mulungu kanituma na kaning'ha nguvu ya muhe wake.

17 Mndewa Mulungu, Mulungu Yelile wa Isilaili,

mkombola wenu, kolonga vino,

"Niye niiyo Mndewa Mulungu, Mulungu wenu,

nomfundizani mbuli zifaya,

nomulongozani muna inzila yomulondeka kufosa.

18 One muhazindilile ndagilizi zangu,

muhawile na tindiwalo siku zose,

fana mazi yogendelela kukilima,

muhapatile haki siku zose,

fana mawimbi ya bahali yogendelela.

19 Welesi wenu wezakuwa wengi fana msanga,

kweli wezakuwa wengi fana vidundulu va msanga,

zina jenu hadizasegezigwa.

Nyelesi zenu zizagendelela kuulongozi wangu."

20 Lelo segeleni Babeli,

kimbileni kulawa Babeli.

Peteni kwa madizi ya kwimba,

gong'ondeni mbuli izo,

longeni mbuli izo mbaka uhelelo wa isi,

longeni, "Mndewa Mulungu kamulopola msang'hani wake Yakobo."

21 Viyawalongoze kuna dibwilingu hawawone ng'hilu,

kagala mazi kulawa muna uluwe kwa ichimu chawo,

katobola luwe mazi yalawa kwa nguvu.

22 Mbali Mndewa Mulungu kolonga,

"Wanhu wotenda mbuli zihile hawezakala kwa tindiwalo."