1 Mndewa Mulungu komulongela mfalume Koleshi,

"Nikusagula weye,

nizakugangamiza muladi uzihume zisi zimwenga,

iviya kuzibena nguvu za wafalume.

Niye nizazivugula nyivi za bululu haulongozi wako.

2 Nizakulongolela na kusegeza milima.

Nizazibenabena nyivi ng'hulu za shaba,

na kukanhakanha mhalalingwe za chuma.

3 Nizakwing'ha ngama zozifisigwe hanhu hahamanyike,

muladi uvimanye kuwa niye iyo Mndewa Mulungu, Mulungu wa Isilaili,

yonikutanga kwa zina jako.

4 Kwa ichimu cha welesi wa Yakobo msang'hani wangu,

na kwa ichimu cha wanhu wano woniwasagule,

nikutanga kwa zina jako,

nikwing'ha zina da hishima,

ingawa weye hunimanyile.

5 Niye niiyo Mndewa Mulungu, habule imwenga,

habule Mulungu imwenga mbali niye.

Nokugangamiza,

mbali weye hunimanyile,

6 muladi wanhu wose kulawa ubanzi wa ulawilo wa zuwa na kulawa ubanzi wa uswelo wa zuwa,

wavimanye kuwa habule Mulungu imwenga mbali niye,

niye niiyo Mndewa Mulungu.

7 Niye notenda bung'hulo na kulumba ziza,

nogala tindiwalo na tibwilitibwili.

Niye Mndewa Mulungu notenda vinhu ivo vose.

8 "Weye ulanga, tonya haki,

weye mawingu lagaza haki,

muladi isi igubikigwe na mazi na ilele ukombola.

Niye Mndewa Mulungu nilumbile vinhu ivo.

9 "Kezagaya munhu yoihuma na yamulumbile,

munhu iyo kalinga fana chizae cha ulongo.

Vino ulongo womuuza munhu yoyaumbile,

‘Koumba choni hano?’

Hebu kumulongela, ‘Sang'hano yako haifaya.’

10 Kezagaya munhu yomulongela tati yake,

‘Vino kweleka choni?’

Hebu munhu yomulongela mami yake,

‘Vino kuvumbula chinhu chaki?’ "

11 Mndewa Mulungu, Mulungu Yelile wa Isilaili,

Mulungu yalumbile Isilaili kolonga kusonhela mbuli zikwiza,

"Molonda kuniuza kusonhela wanangu,

hebu kuniwangiliza sang'hano zangu mwenyewo?

12 Niye iyo nizitendile zisi zose,

iviya nimulumba chila munhu yokala umo.

Makono yangu yayo yanzanze mawingu,

iviya zuwa na mwezi na nhondo zose vabaho kwa mbuli yangu.

13 Nimulongela mfalume Koleshi yatende vinhu vonilonda yavitende.

Nizazigolosa nzila zake zose.

Iviya kezadizenga kaidi bululu da Yelusalemu,

na kuwalekelela wanhu wangu wakalile kuuhami,

mbali hezalonda maliho hebu vitumetume."

Mndewa Mulungu Yeli na Udahi kolonga ivo.

14 Mndewa Mulungu kolonga,

"Utajili wa Misili na vinhu va Kushi,

hamwe na wanhu wa Seba weli watali,

vizakwiza kumwako weye isi ya Isilaili,

vose vizakuwa vako.

Wanhu wawo wezakusang'hanila kuno wafungigwa minyololo,

wezakutumbalila mavindi na kukutogola kuno wolonga,

‘Mulungu wa kweli kahamwe na weye,

habule Mulungu imwenga mbali yeye.’ "

15 Kweli weye niiyo Mulungu uifisa,

weye niiyo Mulungu na mulopozi wa Isilaili.

16 Wanhu wose wosongola nyang'hiti za milungu wezapata chinyala na kwazanywa,

wose wezakwingilwa na chinyala.

17 Mbali wanhu wa Isilaili wezakomboligwa na Mndewa Mulungu siku zose,

hawezagaya na hawezagumigwa chinyala siku zose.

18 Yalumbile ulanga niiyo Mulungu,

katenda isi na kuilumba,

iviya keka vandusilo vigangamale.

Hailumbile isi muladi iwe yabule chinhu,

mbali kalumba muladi ikaligwe na vilumbe wake.

Niiyo yeye yolonga, "Niye niiyo Mndewa Mulungu,

habule imwenga.

19 Silongile chinyele hanhu heli na ziza,

na siwalongele welesi wa Yakobo,

wanizahile hanhu helibule chinhu.

Niye Mndewa Mulungu nolonga ukweli,

mbuli yangu yokwaminika."

20 Mweye wanhu wa zisi zimwenga womuhonyoke,

iduganyeni hamwe mwize,

mweye mulibule nzewele.

Mweye mopapa nyang'hiti za milungu za mibiki,

kuno moipula milungu ija haidaha kulopola wanhu.

21 Izoni mulonge mbuli zenu,

mulonganye muladi mufunge imwe.

Vino yelihi yanduse kugong'onda mbuli kwandusila umwaka?

Vino yelihi yalongile mbuli zino umwaka?

Siyo niye Mndewa Mulungu?

Habule Mulungu imwenga mbali niye.

Niye Mulungu wa haki na mulopozi.

Habule imwenga mbali niye muhala.

22 "Nihindukileni niye mupate kukomboligwa,

hohose hamwili muna iisi yose.

Kwaviya niye niiyo Mulungu, habule imwenga.

23 Niye niilaha kwa moyo wangu,

mbuli yangu yonilonga igoloka,

mbuli yonilonga haizabwela hachisogo.

Chila mavindi yezatumbala haulongozi wangu,

na chila munhu kezailaha kunisang'hanila.

24 Wezalonga kusonhela niye,

‘Haki na nguvu vopatika kwa Mndewa Mulungu yaidumwe.’

Wose wamuwonele ludoko Mndewa Mulungu,

wezamwizila kwa chinyala.

25 Mbali Mndewa Mulungu kezawatenda welesi wa Isilaili wahume na wezadeng'helela."