1 Siku zikwiza kwizalonga,

"Nizakutogoza, weye Mndewa Mulungu.

Kuniwonela ludoko, mbali ludoko lwako lunilekela,

na kuniguma moyo.

2 Mulungu niiyo mulopozi wangu,

nizamuhuwila yeye na sizadumba chinhu.

Kwaviya Mndewa Mulungu niiyo nguvu yangu na wila wangu,

kawa mulopozi wangu."

3 Mwizadeng'helela lusita Mulungu vondayawakombole.

4 Siku zikwiza mwizalonga,

"Mwing'heni hewela Mndewa Mulungu,

mpuleni kwa zina jake,

walongeleni wanhu sang'hano zake,

gong'ondeni zina jake kulu.

5 Mwimbileni Mndewa Mulungu wila wa nhogolwa,

kwaviya kasang'hana mbuli zinogile.

Mbuli izo zimanyike muna izisi zose.

6 Mweye wanhu wa Sayuni,

toweni ng'henze na mwimbe nyila kwa kudeng'helela,

kwaviya yeye niiyo Mulungu Yelile wa Isilaili."