1 Kwenhukeni habehi mutegeleze mweye wanhu wa zisi zose,

kingeni digutwi mweye wanhu wa isi yose na vinhu vikala umo.

Tegelezeni mweye zisi zose na vinhu viliumo.

2 Mndewa Mulungu kezawawonela ludoko wanhu wa zisi zose,

kezawawonela ludoko watowang'hondo wawo wose,

kezawadanganiza na kezawachinja.

3 Mitufi yawo izakwasigwa kunze,

vundo da mitufi iyo dizakwenela,

na damu zawo zizakilima kulawa kumulima.

4 Nhondo za kuulanga zizasegela,

langa dizavunganyizigwa fana talatasi na kwasigwa,

nhondo zose zizalagala,

fana mayani ya mzabibu viyopagatika muna umbiki wake,

fana nhini zinyalile vizilagala.

5 Panga da Mulungu dikomeleza sang'hano yake kuulanga.

Lola dohumuluka kuwatagusa Waedomu,

wanhu waja Mulungu woyailungile kuwadanganiza.

6 Panga da Mndewa Mulungu dizakuwa na damu na mavuta,

dizatapagala damu ya ng'hondolo na luti,

fana viya mabambala ya figo ya bebelu da ng'hondolo,

kwaviya Mndewa Mulungu kezalava nhambiko uko Bosila,

na wanhu wengi wezakomigwa uko Edomu.

7 Ng'ombembago wezakufa,

na madang'ang'a ya ng'ombe na ng'ombe walume. Isi yawo izatapagala damu,

iviya ulongo wizatibwilizika na mavuta yawo.

8 Kwaviya Mndewa Mulungu kanayo siku ya kulihiliza,

mwaka wa kuwalihiza wehi wa Sayuni.

9 Vizanda va isi ya Edomu vizagaluka lami,

ulongo wake wezagaluka baluti,

isi yake izakuwa lami ikwaka.

10 Isi izakwaka ichilo na imisi na haizazimika,

na yosi jake dizakwela uchanyha siku zose,

isi haizakwima ndiya kwa nyelesi zose.

Habule munhu yondayafose muna iisi iyo kaidi.

11 Bundi ng'hengeu na bundi matuwa wezakala umo,

Mndewa Mulungu kezailinga isi yose muladi yainange,

kuuhelelo isi izakuwa bwilingu.

12 Wanhu wohishimigwa hawezakuwa na chochose uko,

nawo wakulu wezasegela.

13 Mbigili zizakota muna zimhongono zawo,

masavu na milengeja vizakota muna ya matongo yawo,

isi iyo izakuwa kaye ya mbwizi na bundi.

14 Ng'hanu na fisi wezakala umo,

dondolo wezaitanga umo,

vilumbe wa ichilo wezahumula umo,

umo wezakala moyo hole.

15 Bundi wezataga mafinga umo na kwalamila,

wezakang'anhula wana na kuwakikiza na mabawa yawo,

chamhanga wezaiting'hana uko,

chila imwe na miyage.

16 Someni muna ichitabu cha Mndewa Mulungu,

"Habule chilumbe chochose chondachiswele,

chila chilumbe chizakuwa na miyage."

Kwaviya Mndewa Mulungu mwenyewo kalonga ivo.

Muhe wake wizawakunzagiza wawo wose.

17 Mndewa Mulungu kazele hanhu ha chila mnyama,

kasang'hanila luzabi kulingila isi iyo,

izakuwa yawo siku zose.