1 Lusita Ahazi mwana wa Yosamu mzukulu wa Uzia, viyakalile mfalume wa isi ya Yuda, mfalume Lesini wa Shamu na mfalume Peka mwana wa Lemalia wa Isilaili, wahita kuditowa bululu da Yelusalemu, mbali wapotwa.

2 Mfalume wa Yuda viyahulike Washami wailumba na Waisilaili, yeye na wanhu wake wadumba ng'hani na wagudemeka fana mibiki yotingisigwa na mbeho.

3 Baho Mndewa Mulungu kamulongela Isaya, "Msole mwanago Sheali Yashubu* uhite kuiting'hana na mfalume Ahazi kuuhelela kudikolongo digala mazi Kudilamba da Uchanyha. Kwizamfika kudikulugumbi hanhu ha kufuwila mawalo.

4 "Mulongele mfalume Ahazi, ‘Iteganye, nyamala na sekeudumbe. Sekeufe moyo kwa ichimu cha wanhu wano waidi weli fana ngodi vizizimika. Sekeufe moyo kwa ichimu cha ludoko lukulu lwa mfalume Lesini na Washami na mwana wa Lemalia. 5 Washami na Waisilaili hamwe na mwana wa Lemalia wafunga imwe muladi wakunange. 6 Walonga, "Chihite chikaiteke isi ya Yuda, chiwadumbize wanhu wake na chiinange isi yawo. Maabaho chizamtenda mwana wa Tabeeli kuwa mfalume wawo. " ’

7 "Mbali niye Mndewa Mulungu nolonga,

‘Mbuli iyo haidahika na haizalawilila.

8 Kwaviya bululu kulu da Shamu niijo Damasiki,

na Damasiki dolangulizigwa na Lesini muhala.

Muna imiyaka malongo sita na mitano,

ufalume wa Isilaili wizabanangigwa,

na Isilaili haizakuwa na ufalume kaidi.

9 Iviya bululu kulu da Isilaili niijo Samalia,

na Samaliya dolangulizigwa na mwana wa Lemalia muhala.

One hamuhuwile, hamwizagangamala.’ "

10 Mndewa Mulungu kamulongela Ahazi kaidi, 11 "Nipule niye Mndewa Mulungu, Mulungu wako nitende chilaguso chochose kulawa hasi ng'hani muna iisi hebu kuchanyha ng'hani kuulanga." 12 Mbali Ahazi kedika, "Sizapula, sizakugeza weye Mndewa Mulungu." 13 Baho Isaya kalonga, "Tegelezeni mweye welesi wa mfalume Daudi. Vino haifaya kuwatenda wanhu walegele kufunya umoyo? Vino mwizamtenda Mulungu iviya yalegele kufunya umoyo? 14 Ivo Mndewa Mulungu mwenyewo kezaweng'ha chilaguso. Mndele ino kezapata wimo na kezakweleka mwana, mwana iyo kezatangigwa Imanueli*. 15 Kezakuja mtindi na uki lusita vondayavimanye kulema mbuli zihile na kusagula kutenda mbuli zinogile. 16 Kwaviya mwana iyo yang'hali hanavimanya kulema mbuli zihile na kusagula kutenda mbuli zinogile, zisi za wafalume wawo waidi wouwadumba zizasigala matongo. 17 Mndewa Mulungu kezamgalilani magayo weye na wanhu wako na kaye yako. Magayo yayo hayanalawilila kwandusila siku ija Waisilaili viwaibagule na wanhu wa Yuda. Kezamgalilani mfalume wa Ashulu yamtoweni."

18 Siku iyo Mndewa Mulungu kezawatowela muluzi wanhu wa Misili weze fana ng'honzi wolawa muna ivizanda va lwanda lwa Naili, iviya wanhu wa Ashulu weze fana dali kulu da nyuki dolawa muna iisi ya Ashulu. 19 Wose wezakwiza na kumemeza makolongo yeli na ngema na zimbane za mabwe na vibago vose vili na miwa na chila hanhu ha kudimila. 20 Siku iyo Mndewa Mulungu kezasang'hanila lumo kulawa kuna ulwanda lwa Efulate, niiyo mfalume wa Ashulu, kezamsenyani nyele zenu na ng'huli zenu na ndevu zenu. 21 Siku iyo munhu kezafuga dang'ang'a da ng'ombe na ng'hondolo waidi. 22 Wezalava maziwa mengi nayo kezakung'wa mtindi. Wose wondawasigale muna iisi wezakung'wa mtindi na uki. 23 Muna isiku iyo chila hanhu hahakalile na mizabibu 1,000 iguligwa kwa shekeli 1,000 za hela, hezakuwa na visasa na mbigili. 24 Wanhu wezahita uko kusaka kuno wana mhinde na misale, kwaviya isi yose izamema visasa na mbigili. 25 Nayo milima yose ikalile ilimigwa, izamema visasa na mbigili, mbaka habule munhu yondayageze kuhita uko. Hanhu baho hezatavangiligwa na ng'ombe na ng'hondolo.