1 Mndewa Mulungu kanilongela, "Sola gome kulu na ujandike vino, ‘Maheli Shalali Hashibazi,’ fambulo jake lopola kuteka na lopola kuhoka." 2 Mbali niye niwatanga Uliya mkulu wa nhambiko na Zakalia mwana wa Yebelekia wawe wakalangama wangu wokwaminika. 3 Maabaho nimbandama muke wangu yakalile mulotezi, nayo kapata wimo na kavumbula mwana wa chilume. Mndewa Mulungu kanilongela, "Mtange mwana iyo, ‘Maheli Shalali Hashibazi.’ 4 Yang'hali mwana hanadaha kulonga, ‘Tata’ hebu ‘Mama,’ utajili wa Damasiki na vinhu va Samalia vizasoligwa na mfalume wa Ashulu."

5 Maabaho Mndewa Mulungu kanilongela kaidi,

6 "Wanhu wano wayalema mazi ya Shilo yokilima ugaluga,

na wawadeng'helela mfalume Lesini na mwana wa Lemalia.

7 Ivo Mndewa Mulungu kezagala mazi ya lwanda yokilima,

mazi yeli na nguvu ng'hani, niiyo mfalume wa Ashulu na watowang'hondo wake wose.

Mazi yayo yezakwiza na kufosa kuna ulwanda lwa Efulate,

na yezamema ng'enge kwa ng'enge.

8 Yezakilima kwa nguvu na kwingila muna iisi ya Yuda,

yezamema na kukwela mbaka muna isingo.

Mbali Mulungu kahamwe na cheye,

ivo kezaikaliza isi yetu,

fana viya ndege viyogubika na mabawa yake."

9 Dunhuleni ndilo mweye wanhu wa zisi,

na mudumbe.

Tegelezeni mweye wose muli zisi za kutali,

isasaleni kuitowa ng'hondo na kugumigwa chinyala,

kweli mwizagumigwa chinyala.

10 Ilungeni mweye wenyewo, mbali haizalawilila,

isasaleni, mbali moisasala bule,

kwaviya Mulungu kahamwe na cheye.

11 Mulungu kanizuma ng'hani sekeniwahige wanhu wa isi ino.

12 Kalonga, "Sekeuilumbe nawo muna zimbuli zihile,

iviya sekeudumbe chiya chiwodumba.

13 Mndewa Mulungu Yeli na Udahi niiyo yolondeka kuhishimigwa na niiyo yelile.

Kolondeka umdumbe yeye muhala.

14 Iyo kezakuwa hanhu ha kukimbilila,

mbali kwa wanhu wa Isilaili na Yuda kezakuwa dibwe da kuikwala,

na kezakuwa kwangwa kwa wakaya wa Yelusalemu.

15 Wanhu wengi wezaikwala,

wezakugwa na kubemendeka,

wezategigwa na kusoligwa."

16 Funga ukalangama wandikigwe na uyagume muhuli malagilizo yayo na weng'higwe wanahina wangu.

17 Nizamgozela Mndewa Mulungu,

iyo yawalemile welesi wa Yakobo.

Nizamuhuwila yeye.

18 Loleni niye na wana waja Mndewa Mulungu woyaning'hile fana chilaguso kwa wanhu wa Isilaili, chilawa kwa Mndewa Mulungu Yeli na Udahi yoyokala uchanyha ya mulima Sayuni.

19 Wanhu wezamulongelani muhite mukatazigwe na wanhu wolonga na mizimu, waja mbuli zawo zilinga fana ndege viyolila, kwaviya wanhu wazowela kuipula milungu yawo. Vino habali muhite kuwapula wanhu wadanganike wawataze wanhu wagima? 20 One wahamulongelani, kumbukeni mafundizo yangu. Walongeleni kuwa mbuli zonilongile zizalawilila. Wanhu wolonga fana ivo wamuna diziza na mbuli ziwolonga za uvwizi.

21 Wanhu wezawegela muna iisi yose, wezakufa moyo na wezakuwa na nzala. Wezawona ludoko kwaviya wana nzala. Wezalongelela na kumduwila mfalume wawo na mulungu wawo kuno wolola kuulanga. 22 Wezailola isi yose, mbali wezawona magayo muhala na ziza na manhesa. Ivo wezakwingila muna diziza totolo.