1 Mndewa Mulungu kolonga, "Mulole msang'hani wangu yonimtaza,

yonimsagule na yoninogeligwe nayo.

Nimguma muhe wangu,

kezawahumiza wanhu wa zisi voilondeka.

2 Hezalila na hezaguta ng'hondo,

iviya hezaguta muna dikulugumbi.

3 Hezausegeza mtete ubeneke

na utambi ufuka yosi hezaluzima.

Kezahumiza voilondeka kwa kwaminika.

4 Yeye hezalegela na hezakufa moyo,

mbaka vondayahumize voilondeka muna izisi zose.

Wanhu weli kutali wogozela mafundizo yake."

5 Mndewa Mulungu kalumba ulanga na kautanda,

iviya kailumba isi yose na vinhu vose vili umo,

yeye koweng'ha mhumuzi wanhu,

na kuwatemela mate wose wokala umo wawe wagima.

Yeye kolonga,

6 "Niye Mndewa Mulungu nikutanga utende voilondeka,

nizakwing'ha nguvu,

kufosela weye nizakwika lagano na wanhu wose,

weye kwizakuwa bung'hulo da wanhu wa zisi zose.

7 Kwizawatenda vipofu walole,

kwizawafungulila wafungwa muna ivifungo,

kwizawalekela waja wakalile wafungigwe muna diziza.

8 Niye zina jangu Mndewa Mulungu.

Sizamwing'ha imwenga ukulu wangu,

na sizatogola nyang'hiti za milungu zitogozigwe fana niye.

9 Mbuli zinilongile zilawilila,

lelo nogong'onda mbuli za sambi,

zing'hali hazinalawilila,

nowagong'ondela mbuli izo."

10 Mwimbileni Mndewa Mulungu wila wa sambi.

Wanhu wa zisi zose wembe nyila za kumtogoza yeye,

mweye wanhu mugenda muna ibahali na chila chinhu chili umo chimtogoze,

zisi za kutali na wanhu wokala umo wamtogoze.

11 Wanhu weli muna dibwilingu na muna yamabululu yose walandule madizi,

wakaya wa vibululu va Kedali wamtogoze,

wakaya wa bululu da Sela wembe kwa kudeng'helela,

walandule madizi kulawa uchanyha ya mulima.

12 Wanhu wose wamtogoze Mndewa Mulungu,

wagong'onde nhogolwa zake kuna ivisiwa.

13 Mndewa Mulungu kalawilila fana galu,

fana mtowang'hondo yoiyoha kuitowa kuna ing'hondo,

na kulagusa kuwa kodaha kuwahuma wehi wake.

14 Mndewa Mulungu kolonga,

"Lusita lutali ninyamala,

nikala hupi na niikimilila kulonga.

Mbali sambi nizalila fana viya mama voyaibasula,

noguta lwangi na nohumuzika.

15 Nizainanga milima na vilima,

mayani yose nizayanyaza.

Nyanda nizazigalusa kuwa isi inyalile,

na malamba nizayanyaza.

16 Nizawalanguliza vipofu muna inzila hawaimanyile,

nizawalongoza muna inzila hawanaifosa,

haulongozi wawo nizadihindula ziza kuwa bung'hulo,

iviya hanhu hadala hezakuwa hahuha.

Mbuli izo nizazitenda na sizapotwa.

17 Wanhu wose wohuwila nyang'hiti za milungu na wolonga,

‘Mweye niiyo milungu yetu,’

wezabwelezigwa kuchisogo kwa chinyala.

18 "Tegelezeni, mweye wasuwamagutwi,

loleni mweye vipofu, mudahe kuwona.

19 Vino yelihi yeli chipofu ng'hani fana msang'hani wangu?

Vino yelihi yeli msuwamagutwi fana msenga yonimtuma?

Vino yelihi yeli chipofu fana munhu ino yonimwikile hakwe?

Vino yelihi yeli chipofu fana msang'hani wangu?

20 Mweye mowona mbuli nyingi,

mbali hamuvimanya,

magutwi yenu yagubuka,

mbali hamuhulika."

21 Kwaviya Mndewa Mulungu kanoga,

kayatenda malagilizo yake yatogozigwe na yahishimigwe.

22 Mbali isi ya wanhu wake itekigwa na ihokigwa,

wose wanamata muna dikombo,

wafungigwa muna ivifungo,

walinga fana ukala ulibule munhu wa kuwalopola.

Watekigwa na habule munhu yolonga, "Walekelelwe."

23 Vino mwizakinga magutwi mutegeleze mbuli ino?

Vino yelihi vimwili yotegeleza goya mbuli zondazilawilile hamwande?

24 Vino yelihi yawagumile wanhu wa Isilaili muna yamakono ya wehi wawo?

Vino yelihi yawalekile wahokigwe vinhu vawo?

Niiyo Mndewa Mulungu ichimuhasanye,

kwaviya walala wetu walema kutegeleza mafundizo yake,

iviya hawayazindilile malagilizo yake.

25 Ivo kawawonela ludoko ng'hani,

kawaleka wakumbigwe na ng'hondo ng'hulu.

Ludoko lwake lufika chila ubanzi,

mbali wawo hawavimanyile,

ludoko lwake lukala fana moto wouwasomile, mbali hawaizindilile mbuli iyo.