1 Ulotezi kusonhela isi ya Misili.

Mndewa Mulungu kokwiza kuno kakwela wingu dohembeluka himahima,

kokwiza mbaka isi ya Misili.

Nyang'hiti za milungu ya Wamisili zomgudemekela,

mizoyo ya Wamisili yogudemeka kwa kudumba.

2 Mulungu kolonga, "Niye nizawakong'hela Wamisili,

ndugu wezaitowa wawo kwa wawo,

wakaya wezaitowa wawo kwa wawo,

mabululu yezaitowa yenyewo kwa yenyewo,

na falume zizaitowa zenyewo kwa zenyewo.

3 Wamisili wezakufa moyo,

niye nizayatibula malungilo yawo,

wezapula kutazigwa na nyang'hiti za milungu na wanhu wolola bao na mizimu.

4 Nizaweka Wamisili muna yamakono ya mfalume msede,

mfalume msede kezawatawala.

Niye Mndewa Mulungu Nili na Udahi nilonga ivo."

5 Mazi ya bahali yezanyala,

lwanda lwa Naili lwizanyala ng'hani.

6 Mifulunda yake izanung'ha vundo,

na mazi ya nyanda za Misili yezahunguka na kunyala ng'hani,

masavu na matete yezanyala.

7 Mumgwazo wa lwanda lwa Naili kwabule chinhu.

Vinhu vose vihandigwe umo vizanyala,

vizahembelusigwa kutali na kwaga.

8 Wanhu wovuwa wezalila,

wanhu wose wolowa muna ulwanda lwa Naili wezakufa moyo.

9 Woluka mawalo ya chitani wezakufa moyo,

wofuma chitani wezakuwa nyondenyonde.

10 Wanhu wotenda usang'hano wa kuluka mawalo wezaholola,

na waja vibaluwa wezalongelela.

11 Vinyandama wa Soani wabozi ng'hani,

vinyandama wabala wa mfalume wa Misili wolonga mbuli za chibozi.

Kodahaze kumulongela mfalume wa Misili,

"Niye munhu nili na ubala,

mwanahina wa wafalume wa umwaka"?

12 Lelo weye Mfalume wa Misili, wakulihi vinyandama wako weli wabala?

Wakulaguse na kukulongela mbuli ija Mndewa Mulungu Yeli na Udahi iyawalungile Wamisili.

13 Vinyandama wa Soani wabozi,

walangulizi wa bululu da Memfisi wavwiziligwa.

Makolo wawo wawavwizila Wamisili.

14 Mndewa Mulungu kaweng'ha muhe wa tibwilitibwili,

wawavwizila Wamisili muna zimbuli zose ziwailungile,

wawa fana munhu yakoligwe yozazalika na kudeka.

15 Habule munhu yoyose muna iisi ya Misili,

yawe mulangulizi hebu mkaya,

yawe yomanyika hebu hamanyika,

yodaha kutenda chinhu chochose chifaya.

16 Siku izo Wamisili wose wezadumba fana wanaake viwodumba, wezagudemeka kwa kudumba vondawamuwone Mndewa Mulungu Yeli na Udahi kawagolosela mkono wake muladi yawataguse. 17 Isi ya Yuda izawadumbiza Wamisili. Wose wondawalongeligwe mbuli za isi ya Yuda wezadumba kwa ichimu cha mbuli ija Mndewa Mulungu yeli na Udahi iyailungile kuwatendela.

18 Siku zikwiza ulonzi wa Chiebulania wizalongigwa muna yamabululu matano ya Misili. Wanhu wa mabululu yayo wezailaha kumuhuwila Mndewa Mulungu Yeli na Udahi. Bululu dimwe dizatangigwa, "Bululu da zuwa."

19 Siku zikwiza hagati ya isi ya Misili hezakuwa na lupango lwa Mndewa Mulungu, iviya kuna imhaka ya Misili kwizakuwa na mhanda ya lukumbuso kwa Mndewa Mulungu. 20 Ivo vizakuwa vilaguso va kumulagusa Mndewa Mulungu yeli na Udahi muna isi ya Misili. Wanhu wahapula kutazigwa kwa ichimu cha wehi wawo, Mndewa Mulungu kezagala mkombola muladi yawalopole na kuwagombela. 21 Mndewa Mulungu kezailagusa kwa Wamisili na Wamisili wezammanya Mndewa Mulungu siku izo. Wezamsang'hanila kwa nhambiko na nhosa, iviya wezamulahila Mndewa Mulungu vilaho na kuvifikiza. 22 Mndewa Mulungu kezawagalila hulo Wamisili na kuwahonya. Wezambwelela, nayo kezawategeleza mbuli zawo ziwapulile na kuwahonya.

23 Siku izo kwizakuwa na kulugumbi dilawa isi ya Misili kuhita isi ya Ashulu. Waashulu wezahita isi ya Misili na Wamisili wezahita isi ya Ashulu. Wamisili na Waashulu wezatambika hamwe. 24 Siku izo Waisilaili wezapetigwa hamwe na Wamisili na Waashulu. Wanhu wa zisi izo wezawatemela mate wanhu wamwenga. 25 Mndewa Mulungu yeli na Udahi kezawatemela mate na kulonga, "Watemeligwe mate Wamisili wanhu wangu na Waashulu sang'hano ya makono yangu na Waisilaili woniwasagule kuwa wanhu wangu."