1 Mndewa Mulungu kolonga,

"Ulanga niicho chigoda changu cha chifalume

na isi niicho chigoda cha kwikila magulu yangu.

Vino mweye mwizanizengela kaye ilingile vilihi hanhu hondanihumule?

2 Niye mwenyewo nivitenda vinhu ivo vose,

iviya vinhu vose vangu.

Mbali nomgesa munhu nyondenyonde yeli na usungu,

munhu yogudemeka kwa kudumba viyohulika mbuli yangu.

3 Wanhu wonilavila nhambiko ya ng'ombe walinga fana wanhu wowakoma wanhu.

Wanhu wonilavila nhambiko ya mwanang'hondolo walinga fana wanhu wombena umbwa isingo.

Wanhu wonilavila nhosa ya ndiya walinga fana wanhu wolava damu ya nguluwe.

Wanhu wosoma ubani walinga fana wanhu wohita kumtambikila mulungu wa uvwizi.

Wawo wasagula kusondelela magesa yawo wenyewo,

iviya wodeng'helela mbuli zitibusa.

4 Lelo nizawagalila mahulo makulu,

nizawagalila vinhu vidumbigwa.

Kwaviya vinitangile, habule munhu yanidike,

vinilongile, habule munhu yanitegelezile.

Watenda mbuli zihile haulongozi wangu,

na wasagula mbuli zonihila."

5 Tegelezeni mbuli ya Mndewa Mulungu,

mweye mugudemeka kwa ichimu cha mbuli yake,

"Ndugu zenu womwihilani na womuwingani kwa ichimu changu.

Womsekani kuno wolonga,

‘Mulungu yalaguse ukulu wake,

na cheye chiwone mweye mohuma,’

mbali wawo wenyewo wezakugwa chinyala.

6 Dizi da tibwilitibwili dolawa muna dibululu,

tegelezeni nyangi kulawa muna Ikaye ya Mulungu.

Dizi da Mndewa viyowalihiliza wehi wake.

7 "Bululu jangu jelile dilinga fana mwanamke yoibasula bila usungu,

usungu haunaluma kaibasula mwana kamala.

8 Vino yelihi yahulike mbuli ilingile iyo?

Vino yelihi yawonile mbuli ilingile iyo?

Vino isi yose yodaha kwelekigwa siku dimwe?

Vino isi yodaha kulawilila kwa lusita luguhi?

Kwaviya Sayuni viyapatile usungu kavumbula mwanage bahaja.

9 Vino niwalole goya wanhu wangu mbaka habehi ya kwelekwa na niwakimilile sekewelekwe?

Hebu niye mwenyewo niweng'ha wana na niwafunge sekewalele?

Niye Mndewa Mulungu nolonga ivo.

10 Mweye mudilonda bululu da Yelusalemu,

deng'heleleni hamwe najo,

mweye mukalile mudililila,

lelo deng'heleleni hamwe najo.

11 Yelusalemu komong'hezani fana mama,

na mweye mwizakwiguta na kudeng'helela."

12 Kwaviya Mndewa Mulungu kolonga,

"Nizamgalilani tindiwalo fana lwanda,

utajili wa zisi ulinga fana chizanda chikilima,

mwizakong'ha na kunyamuligwa muna yamakono yake,

na kuhembelezigwa muna yamagulu ya mami yake.

13 Fana mama viyomuhembeleza mwanage,

iviya nizawahembeleza wanhu wa bululu da Yelusalemu."

14 Muhawona mbuli zino, mizoyo yenu izadeng'helela,

mivuha yenu izapata nguvu fana mayani mabisi.

Baho izamanyika kuwa niye Mndewa Mulungu nowakaliza wasang'hani wangu,

mbali nizawawonela ludoko wehi wangu.

15 Mndewa Mulungu kezakwiza na moto,

iviya matololi yake ya ng'hondo yalinga fana vulavumbi.

Kezatagusa kwa ludoko lwake,

na kezakalikila kwa milambi ya moto.

16 Mndewa Mulungu kezahumiza,

kezawatagusa wanhu wose kwa zele na moto,

kezawakoma wanhu wengi.

17 Mndewa Mulungu kolonga, "Kuna wanhu waisafya na kuisunha muladi wadahe kwingila muna zinhambiko za milungu ya uvwizi. Womtegeleza munhu yoja nguluwe na mhuku na vinhu vambule mwiko, wezakomigwa hamwe kuuhelelo.

18 "Niye noyamanya magesa yawo na nhendelo zawo, nokwiza kuwakunzagiza wanhu wa zisi zose na makabila yose, waikunzagize hamwe na wauwone ukulu wangu.

19 "Nizakwika chilaguso hagati yawo, nizawagala wanhu wahonyokwe kuhita muna izisi zimwenga uko Talishishi na Puli na Ludi isi imanyike kwa wanhu wake magalu wa kukwega mhinde, iviya wezahita isi ya Tubali na Giliki na visiwa va kutali uko wanhu hawanahulika mbuli zangu na hawanauwona ukulu wangu. Wezagong'onda ukulu wangu hagati ya zisi zose.

20 "Nawo wezawagala ndugu zenu wose wokala muna izisi zimwenga, mbaka kuna umulima wangu welile uko Yelusalemu kuwa nhambiko kwa Mndewa Mulungu. Wezakwiza kwa kukwela falasi na matololi ya ng'hondo na matololi makulu, wezakwela uchanyha ya nyumbu na ngamia." Mndewa Mulungu kolonga ivo. "Wezawagala fana Waisilaili viwogala nhosa zawo za ndiya muna ikaye ya Mndewa Mulungu, muna ivia velile na kuzindilila malagilizo ya nhambiko. 21 Wamwenga wawo nizawasagula wawe wakulu wa nhambiko na wamwenga wawe Walawi," Mndewa Mulungu kolonga ivo.

22 "Fana viya ulanga wa sambi na isi ya sambi vondaniviuse vondavikale siku zose kwa udahi wangu, niivo nyelesi zenu na mazina yenu vondavikale siku zose. 23 Chila dugila da kwima kwa mwezi na chila Siku ya Mhumulo, wanhu wose wezakwiza kunitambikila," Mndewa Mulungu kolonga ivo. 24 "Wawo wezalawa kunze kulola mitufi ya wanhu wanilemile niye. Wang'onyo wondawaije mitufi iyo hawezakufa na moto wondauisome hawizazimika. Wanhu wose wezayehula mitufi iyo."