1 Munhu yotenda mbuli zinogile yahadanganika,

habule munhu yogesa,

munhu yanogile yahasegezigwa muna iisi,

habule munhu yoimanya mbuli iyo.

Munhu iyo yanogile kahamizigwa muladi sekeyapatigwe na mbuli ihile.

2 Yeye kokwingila muna ditindiwalo.

Wanhu wosondelela nzila igoloke,

wezadanganika kwa tindiwalo.

3 Mbali Mulungu kolonga,

"Mweye wahawi, izoni hano munitegeleze,

mweye munilekile na mutambikila milungu imwenga.

4 Mweye monisekela,

monizumila na kunizeha.

Mweye wenyewo wadugi kwandusila mwanduso,

mweye wavwizi.

5 Mweye molonda kuibandama hasi ya mibiki ya kutambikila ya miyaloni,

iviya hasi ya chila mbiki uli na mayani mabisi,

mowakoma wanenu na kuwatendela nhambiko muna yamakolongo na muna zimbane za mabwe.

6 Mosagula mabwe yahuhile muna yamakolongo na moyatenda kuwa milungu yenu.

Moyetilila nhosa ya upele na moyagalila nhosa ya usage.

Vino sizamtagusani kwa mbuli izo?

7 Moibandama uchanyha ya milima mitali,

iviya mohita uko kutambika.

8 Mutumbika nyang'hiti zenu kuchisogo ya nyivi zenu.

Mweye munileka niye,

muvula mawalo yenu na mukwela muna yamakomwa yenu yamakulu.

Mulagana na waja mulonda kuibandama nawo,

maabaho muibandama nawo.

9 Moiboboda mavuta yonung'ha goya na mavuta mengi,

maabaho mohita kumtambikila mulungu Moleki.

Mowatuma wasenga wenu uko na uko woizahila milungu ya kuitambikila,

wafika mbaka kuzimu.

10 Mulegela na miyanza yenu,

mbali hamufile moyo,

muing'ha nguvu zimwenga,

lekamana hamusinduke.

11 "Vino mumdumba yelihi,

mbaka mulonga uvwizi?

Hamunikumbuke niye,

na hamugesile mbuli zino muna imizoyo yenu.

Vino muleka kunidumba kwaviya simzumileni siku nyingi?

12 Mogesa motenda goya,

mbali nizagong'onda mbuli zenu,

iyo milungu yenu haizamfayani.

13 Vondamulilile kutazigwa,

chilole fana nyang'hiti zenu zodaha kumkombolani.

Beho dizamuhembelusani kutali,

mhumuzi izamwasani kutali.

Mbali wanhu wonihuwila,

wezaihazi isi,

iviya mulima wangu welile wizakuwa wawo."

14 Mndewa Mulungu kolonga,

"Zengeni, zengeni, sasaleni nzila.

Segezeni ng'walo zose muna zinzila za wanhu wangu."

15 Mulungu yokala uchanyha ng'hani,

yeye yokala siku zose na yotangigwa Yelile, kolonga,

"Niye nokala uchanyha, hanhu helile,

nokala na wanhu wosama na woinyendanyenda.

Niye nizawaguma moyo wanhu woinyendanyenda,

na kuwaguma moyo wanhu wosama.

16 Kwaviya sizaihuma nawo siku zose,

na sizawawonela ludoko siku zose,

buleivo, wawo woniwaumbile wezasinduka haulongozi wangu.

17 Niwawonela ludoko ng'hani kwa ichimu cha uhasanyi wawo,

niwatagusa na nichifisa chihanga changu na kupata ludoko.

Mbali wawo wagendelela kutenda vinhu viwailungile.

18 Niziwona nhendelo zawo, mbali nizawahonya,

nizawalongoza na kuwaguma moyo wanhu wolila.

19 Niwatenda wembe wila wa nhogolwa.

Niye nizaweng'ha tindiwalo,

nizaweng'ha tindiwalo wanhu weli kutali na weli habehi."

Mndewa Mulungu kolonga,

"Niye nizawahonya."

20 Mbali wanhu wotenda mbuli zihile walinga fana bahali ikumbigwe na beho kulu na haidaha kutindiwala,

mazi yake yogala nhope na unyolodo.

21 Mulungu wangu kolonga,

"Wanhu wotenda mbuli zihile hawapata tindiwalo."