1 Mndewa Mulungu kezauwonela ubazi welesi wa Yakobo, kezawasagula Waisilaili kaidi na kuwabweleza muna iisi yawo wenyewo, iviya wageni wezakwiza na kukala na wanhu wa kaye ya Yakobo. 2 Wanhu wa zisi zimwenga wezawataza Waisilaili kubwela muna iisi yawo wenyewo, nawo Waisilaili wezawatawala wanhu wa zisi izo na wezakuwa watumwa wawo. Lelo waja wawatekile wezatekigwa na Waisilaili. Wezawatawala waja wawagazile.

3 Mweye Waisilaili, lusita Mndewa Mulungu vondayamtendeni muhumule kulawa muna yamagayo na mawine na sang'hano ndala, 4 mwizakwimba wila uno wa kumkeweza mfalume wa Babeli,

"Munhu yogaza kakeng'enhigwa,

ukali wake ukasangigwa.

5 Mndewa Mulungu kaugwisa utawala wa wanhu wotenda mbuli zihile,

kazibena fimbo za watawala.

6 Wawo wawawonela ludoko wanhu wa zisi zimwenga,

wawatowa dimwe kwa dimwe,

na kuwatawala kwa ludoko ng'hani na kuwagaza.

7 Mbali sambi wanhu wa zisi zose wohumula kwa tindiwalo,

wokwimba kwa kudeng'helela.

8 Mibiki ya misonobali na mielezi ya Lebanoni,

yodeng'helela haulongozi wawo na yolonga,

‘Kwaviya mugwisigwa hasi,

habule yondayeze kuchikanha.’

9 "Kuzimu kusamhuka muladi kukuhokela.

Wafalume wadanganike wokwiza kukuhohela.

Wafalume wa zisi zimwenga wokwinuka muna ivigoda vawo va chifalume.

10 Wose wezakulongela,

‘Sambi weye kuwa nyondenyonde,

na kulinga fana cheye.

11 Ukulu wako wohulumusigwa kuzimu,

hamwe na ngoma na nyila za via vako va lusingija,

kogonela funza,

na koigubika mhembele.’ "

12 Weye mfalume uli fana nhondo ya imitondo ikwaka na kumwemwesa,

lola viugwile kulawa kuulanga,

weye kuwahuma wanhu wa zisi zose.

13 Kugesa muna umoyo wako,

"Nizakwela uchanyha kuulanga,

nizachinula chigoda changu cha chifalume,

uchanyha ya nhondo za Mulungu.

Nizakala uchanyha ya mulima wa Zafoni,

kuwoiting'hana milungu, uko kutali na ubanzi wa kasikazi.

14 Nizakwela uchanyha kufosa mawingu,

nizaitenda fana Mulungu Yeli na Udahi."

15 Mbali kuhumulusigwa mbaka kuzimu,

hasi ng'hani muna dikombo.

16 "Wondawakuwone wezakubunhulila yameso,

wezakwazanywa na wezalonga,

‘Vino ino iyo yagudemeze isi yose na kuzitingisa falume?

17 Vino ino iyo yagalule isi yose iwe fana bwilingu na kutakamiza mabululu?

Vino ino niiyo yawalemese wafungwa wake sekewabwele ukaye?’

18 Wafalume wose wa zisi wawandigwa kwa hishima,

chila munhu muna dileme jake.

19 Mbali weye kwasigwa kunze ya dileme jako,

fana tambi jasigwe,

mtufi wako ubojogigwa,

kutumbikiligwa mitufi ya wanhu wakomigwe na zele.

20 Weye hwizawandigwa hamwe na wafalume wamwenga,

kwaviya kuibananga isi yako na kuwakoma wanhu wako.

Wanhu wotenda mbuli zihile wazimizigwe siku zose.

21 Sasala hanhu ha kuwachinja wanage,

kwa ichimu cha uhasanyi wa wasaho zawo,

sekeweze kuinuka muladi kuihazi isi,

na kuyamemeza mabululu yawo muna iisi yose."

22 Mndewa Mulungu Yeli na Udahi kolonga,

"Nizaditowa bululu da Babeli,

nizabananga chila chinhu,

nizawananga wanhu wose wasigale muna dibululu na welesi wawo.

23 Nizaitenda isi iyo kuwa ukazi wa wanyama wa kumbago,

iviya izakuwa na malamba ya mazi yatibuke.

Nizawafyagila wanhu wa isi iyo kwa fyagilo da kunanga." Mndewa Mulungu yeli na Udahi kolonga ivo.

24 Mndewa Mulungu Yeli na Udahi kailaha,

"Chila chiniilungile chizalawilila,

nizatenda fana viniilahile.

25 Nizawananga Waashulu muna iisi yangu,

nizawabojoga kuna imilima yangu,

nizawasegezela wanhu wangu nila ya kubabanyigwa na mbahasha ya magayo yawo."

26 Mndewa Mulungu kailunga kuwatendela ivo wanhu wa isi yose,

lusita vondayawataguse wanhu wa zisi zose.

27 Vino Mndewa Mulungu yeli na Udahi yahailunga mbuli, yelihi yodaha kugalula chiyailungile?

Yahagolosa mkono wake kutagusa yelihi yondayamulemese?

28 Mwaka uyadanganike mfalume Ahazi, Mulungu kalava usenga,

29 "Mweye Wafilisiti sekemudeng'helele,

kwaviya wehi wenu wahumigwa,

wawo walinga fana zoka dili na sungu.

Mbali dihalawa zoka ijo, dizakwiza zoka dikimbila ng'hani.

30 Wanyondenyonde wezakwiguta,

na wanhu wopuwa wezakala vinogile.

Mbali wanenu wa udele nizawakoma na nzala,

iviya yoyose vimwili yondayasigale nizamkoma.

31 Mweye wanhu wa bululu, guteni ng'hondo na mulile,

mweye Wafilisiti wose dumbeni,

kwaviya watowang'hondo wengi wokwiza fana timbwisi kulawa ubanzi wa kasikazi,

na habule mtowang'hondo yondayakalame.

32 Lelo wasenga wa isi ya Filisiti wezakwidikigwa vilihi?

Wezalongeligwa, ‘Mndewa Mulungu kazenga vinogile Sayuni,

na wanhu wake wowoneligwa wezakimbilila uko.’ "