1 Mulungu wenu kolonga,

"Wagumeni moyo wanhu wangu,

hiteni mkawagume moyo.

2 Longeni na wakaya wa Yelusalemu kwa uhole,

walongeleni kuwa utumwa wawo umala,

walekeleligwa uhasanyi wawo.

Mndewa Mulungu kawatagusa viilondeka kwa ichimu cha uhasanyi wawo wose."

3 Dizi da munhu dolonga kuchuwala,

"Msasalileni Mndewa Mulungu nzila,

mgoloseleni dikulugumbi Mulungu wetu.

4 Chila kolongo dizakwinuligwa,

chila mulima na chisugulu vizasesigwa.

Chila kombo dizasilizigwa,

na hanhu hapaluzigwe hezakwikigwa goya.

5 Maabaho ukulu wa Mndewa Mulungu wizagubuligwa,

na wanhu wose wezauwona.

Mndewa Mulungu kalonga mbuli izo."

6 Tegeleza, dizi da munhu yolonga, "Weye lila!"

Mbali niye niuza, "Nililile choni?"

Kalonga, "Lila, ‘Wanhu wose walinga fana mayani.

Unovu wawo ulinga fana luwa da kudibawe.

7 Mayani yonyala na maluwa yolagala,

kwaviya mhumuzi ya Mndewa Mulungu yoyahuvila.

Kweli wanhu walinga fana mayani.

8 Mayani yonyala na maluwa yolagala,

mbali mbuli ya Mulungu wetu yokala siku zose.’ "

9 Mweye wanhu wa Sayuni, hiteni kuna umulima mtali,

mweye wanhu wa Yelusalemu, kagong'ondeni mbuli inogile.

Landuleni ng'hani madizi yenu, sekemudumbe.

Walongeleni wanhu wa mabululu ya Yuda,

"Mulungu wenu kokwiza."

10 Mndewa Mulungu kokwiza kwa nguvu,

kotawala kwa mkono wake.

Kokwiza na wanhu woyawakombole.

11 Kezadidima bumbila jake,

fana viya mdimi viyowakunzagiza wanang'hondolo.

Kezawapapa hachaha,

iviya ng'hondolo wokong'heza kezawalanguliza ugaluga.

12 Vino yelihi yodaha kuyalinga mazi ya bahali kwa makono yake?

Vino yelihi yodaha kuulinga ulanga kwa makono yake?

Vino yelihi yodaha kuguma matimbwisi muna ichia cha kulingila?

Vino yelihi yodaha kuilinga milima kwa mizani?

13 Vino yelihi yodaha kumulongela Mndewa Mulungu cha kutenda?

Vino yelihi yodaha kumfundiza Mndewa Mulungu hebu kumwing'ha magesa?

14 Vino Mndewa Mulungu kampula yelihi yamtaze kuvimanya?

Vino yelihi yamfunzile nzila igoloke?

Vino yelihi yamwing'hile kuvimanya,

na yamulaguse viilondeka yawe na nzewele?

15 Wanhu wa zisi walinga fana dondo da mazi muna inongo,

na fana timbwisi muna imizani.

Kumwake visiwa vibuha fana timbwisi.

16 Ngodi zose za Lebanoni ndodo na wanyama wake wose wadodo kwa nhambiko za kutimbula haulongozi wa Mulungu.

17 Zisi zose siyo chinhu haulongozi wake,

kumwake yeye vinhu vose visakala na havifaya.

18 Vino Mndewa Mulungu mwizamulinganyiza na yelihi?

Vino mwizamulinganyiza na choni?

19 Halinganyizigwa na nyang'hiti zisongoligwa.

Fundi kozisongola na muhunzi kozigubika na zahabu,

na kuzihamba na minyololo yotendigwa na madini ya hela.

20 Munhu yeli ngayengaye ng'hani hadaha kulava nhosa ya vinhu vino,

kosagula mbiki hauwola na komulonda fundi yodaha kusongola nyang'hiti inogile.

21 Vino hamuvimanyile?

Vino hamuhulika?

Vino mweye hamunalongeligwa kwandusila mwanduso?

Vino hamuvimanyile kwandusila isi viilumbigwe?

22 Isi ilumbigwa na iyo yokala kuulanga,

kulawa uko wakaya wa isi walinga fana nyenyele.

Yeye kanzanza ulanga fana panzia na kuupumbulula fana hema.

23 Yeye kowahumulusa watawala weli na nguvu,

kowatenda watawala wa isi kuwa hawafaya.

24 Wawo walinga fana maluwa yokwandusa kota.

Wang'hali kota mizizi muna uulongo,

Mndewa Mulungu kowahuvila wonyala,

vulavumbi dowahembelusa fana mayani yanyalile.

25 Mulungu Yelile kouza,

"Vino yelihi yondamumulinganyize na niye?

Vino kuna munhu yalingile fana niye?"

26 Loleni kuulanga.

Vino yelihi yazilumbile nhondo izo zose?

Lelo yelihi yozilongoza fana bumbila jake da watowang'hondo?

Iyo yovimanya peta yake,

na kuzitanga kwa mazina yake.

Habule nhondo iswela, kwaviya yeye kana udahi ng'hani.

27 Mweye wanhu wa Isilaili muli welesi wa Yakobo,

habali moiyalala na molonga,

"Mndewa Mulungu hachigesa,

Mulungu wetu hachigesa mbee?"

28 Vino mweye hamuvimanyile?

Vino hamunahulika?

Mndewa Mulungu niiyo Mulungu yokala siku zose,

iyo yalumbile ulanga na isi.

Yeye halegela na hamalilwa na nguvu,

habule yodaha kuumanya udahi wake.

29 Koweng'ha nguvu wamalilwe na nguvu,

iviya koweng'ha nguvu waja walegele.

30 Mbaka wabwanga wolegela

na wezakugwa na kuikwala.

31 Mbali wose womuhuwila Mndewa Mulungu, nayo kezawagangamiza.

Wezaguluka uchanyha fana masumula,

wezakimbila bila kulegela,

wezagenda na hawezasinduka.