1 Yano malaguso yoyalagusigwe Isaya mwana wa Amozi kusonhela wanhu wa Babeli.

2 Mulungu kolonga,

"Musimike bendela uchanyha ya mulima ulibule mibiki,

muwagutile watowang'hondo,

muwenulile makono wanhu,

muladi watowe ulwivi lukulu lwa bululu.

3 Niye niwalagiliza wanhu wasaguligwe kuitowa ng'hondo,

niwatanga wanhu wawo magalu,

waja woitogoza kuno wodeng'helela,

weze kufikiza lungilo jangu da kutagusa."

4 Tegelezeni nyangi kuna imilima,

nyangi za bumbila kulu da wanhu.

Tegelezeni nyangi za zisi nyingi,

nyangi za wanhu wa zisi ziiduganye hamwe.

Mndewa Mulungu Yeli na Udahi kowaduganya watowang'hondo.

5 Wawo wokwiza kulawa isi ya kutali,

wolawa hata uhelelo wa zisi zose.

Mndewa Mulungu na waja yowatuma kulagusa ludoko lwake wokwiza kuinanga isi yose.

6 Lileni, kwaviya siku ya nhaguso ya Mndewa Mulungu yahabehi,

yokwiza fana hulo dilawa kwa Mulungu Yeli na Udahi.

7 Ivo makono ya chila munhu yezaboba,

chila munhu kezakufa moyo.

8 Wanhu wezadumba,

wezakuwa na usungu fana muke yoibasula,

Wezailola kwa kudumba,

milomo yawo izakuwa ng'hwaa.

9 Siku ya nhaguso ya Mndewa Mulungu yokwiza,

izakuwa siku ya ludoko na ng'hasiliki.

Kezaitenda isi kuwa matongo,

na kezawananga wahasanyi weli umo.

10 Nhondo zose hazizalava bung'hulo,

zuwa vidisomoza dizagumigwa ziza,

mwezi hawizalava bung'hulo jake.

11 Mndewa Mulungu kolonga, "Nizaitagusa isi yose kwa wihi wake,

nizawatagusa wanhu wotenda mbuli zihile kwa ichimu cha uhasanyi wawo,

nizakomeleza udugi wa wanhu weli na magoda,

na nizakomeleza magoda ya wanhu watatali.

12 Nizawatenda wanhu kuwa wadodo kufosa zahabu yelile,

wanhu wezakuwa wadodo kufosa zahabu ya isi ya Ofili.

13 Nizaugudemeza ulanga,

na vandusilo va isi vizatingisika,

kwa ichimu cha ludoko lwangu niye Mndewa Mulungu Nili na Udahi.

14 Chila munhu kezakuwa fana mhala yosakigwa,

kezakuwa fana ng'hondolo yelibule mdimi,

kezabwela kwa wanhu wake mwenyewo,

kezakimbilila isi yake iyelekigwe.

15 Munhu yondayatekigwe kezahomigwa,

wose wondawagwiligwe wezakomigwa na panga.

16 Wana ving'hele wezahondigwa haulongozi wawo,

wezahokigwa kaye zawo na iwake zawo wezakwangaligwa.

17 "Nizawakong'hela Wamedi weze kuwatowa,

wanhu waja hawagesa hela na hawamelela mate zahabu inogile.

18 Misale yawo izawakoma wabwanga na hawezawawonela ubazi wana ving'hele,

iviya hawezawalola wana kwa ubazi.

19 Mulungu kezadinanga bululu da Babeli,

fana viyanangile mabululu ya Sodoma na Gomola.

Babeli diwa bululu dinogile na kulu,

wanhu wake woigoda ng'hani,

mbali Mulungu kezadinanga.

20 Wanhu hawezakala umo kaidi.

Habule mfosanzila yondayazenge hema jake

na habule mdimi yondayadime ng'hondolo wake umo.

21 Mbali wanyama wa kuchuwala wezagona umo,

mbwizi wezamemeza kaye za bululu,

na bundi wezakala umo,

na dondolo wezakwangala umo.

22 Fisi wezalila muna zimhongono zawo,

matukwa wezawoneka muna zikaye zawo ng'hulu na zinogile.

Lusita lwa kutagusigwa Babeli lwa habehi na siku zake hazongezigwe."