1 Muhe wa Mulungu kahamwe na niye,

kwaviya Mndewa Mulungu kanituma niwagong'ondele mbuli inogile wanhu woinyendanyenda.

Kwaviya kanituma niwahonye wanhu wabeneke moyo,

niwagong'ondele kuilegeha wanhu waja watekigwe,

na wafungwa wafunguliligwe.

2 Kanituma kugong'onda mwaka wa ulopozi wa Mndewa Mulungu,

na siku ya kuwalihiliza wehi wa Mulungu wetu.

Kanituma niwagume moyo wanhu wose wolila,

3 niweng'he vilondeka waja wolila umo Yelusalemu,

muladi kuweng'ha kombelo da maluwa badala ya maivu,

kuweng'ha mavuta ya kudeng'helela badala ya kulila,

kuweng'ha walo da nhogolwa badala ya kufa moyo.

Kwaviya watenda mbuli zinogile, wezatangigwa mibiki ya miyaloni,

iyahandile Mndewa Mulungu kulagusa ukulu wake.

4 Wezazenga kaidi hana yamatongo,

wezahazenga kaidi hanhu halekigwe bila chinhu kwandusila umwaka,

wezayazenga kaidi mabululu yabomoligwe,

yalekigwe bila chinhu kwa nyelesi nyingi.

5 Baho nyambenyambe wezamdimilani mabumbila ya wanyama wenu,

nyambenyambe wezamsang'hanilani muna imigunda yenu,

na wezamuloleselani goya migunda yenu ya mizabibu.

6 Mbali mweye mwizatangigwa, "Wakulu wa nhambiko wa Mndewa Mulungu."

Mwizatangigwa, "Wasang'hani wa Mulungu wetu."

Mwizapata utajili wa zisi zimwenga,

kwa ukulu wawo mwizamweda na kwiitogoza.

7 Badala ya chinyala chenu, mwizatemeligwa mate,

badala ya kuzehigwa, mwizadeng'helela uhazi wenu,

muna iisi yenu mwizahazi vinhu vingi,

na mwizadeng'helela siku zose.

8 Mndewa Mulungu kolonga,

"Nolonda wanhu wahumize voilondeka,

nokwihila kuhoka na wihi.

Kwa uwaminika wangu,

nizawagweka wanhu wangu,

nizatenda nawo lagano da siku zose.

9 Nyelesi zawo zizamanyika muna izisi na muna yamakabila.

Chila munhu yondayawawone, kezavimanya kuwa wanhu wawo watemeligwa mate na Mndewa Mulungu."

10 Nodeng'helela ng'hani,

moyo wangu womsekelela Mulungu wangu,

kwaviya kanivaza mawalo ya ulopozi,

kanigubika mawalo ya haki,

fana munhu yosola viyoihamba na kombelo dili na maluwa,

fana muke yosoligwa viyoihamba na mahambo ya zahabu.

11 Kwaviya fana viya isi viyoteza mimea yose,

iviya ulongo muna imigunda viusiliza mbeyu zihandigwe.

Mndewa Mulungu kezatenda haki na nhogolwa zote muna izisi zose.