1 Mwaka uyadanganike mfalume Uzia, Mndewa Mulungu kanilagusa malaguso, muna yamalaguso, nimuwona Mndewa Mulungu kakala muna ichigoda chake cha chifalume chikalile uchanyha ng'hani. Mhindo ya walo jake yenela muna ikaye yose ya Mulungu. 2 Uchanyha yake wakala vilumbe weli na mabawa, chila chilumbe chikala na mabawa sita, maidi yagubika chihanga na maidi yagubika lukuli na maidi ya kugulukila.

3 Wakala woitanga wawo kwa wawo.

"Yelile, yelile, yelile,

Mndewa Mulungu Yeli na Udahi kela,

zisi zose zimema ukulu wake."

4 Madizi yawo yatingisa mibiki yamhilile zinyivi za Kaye ya Mulungu, nayo kaye imema yosi.

5 Nilonga, "Nizagaya, kwaviya nyambula mwiko na nokala hamwe na wanhu wambule mwiko na meso yangu yamuwona Mfalume niiyo Mndewa Mulungu Yeli na Udahi."

6 Baho imwe mwa waja vilumbe weli na mabawa kaguluka na kanizila kuno kamha kala da moto muna umkono wake, kala ijo kadisola na batilo kulawa muna ulupango. 7 Kanidalisa mmulomo wangu na kalonga, "Kala dino didalisa mulomo wako, uhasanyi wako usegezigwa na uhasanyi wako ulekeleligwa."

8 Maabaho nihulika dizi da Mndewa Mulungu douza, "Nimtume yelihi? Vino yelihi yondayahite kwa ichimu chetu?" Niye nilonga, "Nabaha. Nhume niye."

9 Kanilongela, "Hita ukawalongele wanhu wano,

‘Mwizagendelela kutegeleza, mbali hamwizavimanya.

Mwizagendelela kulola, mbali hamwizavimanya.’ "

10 Maabaho kanilongela,

"Kwa kulotela ivo, kwizaitenda mizoyo ya wanhu wano iwe midala,

magutwi yawo sekeyahulike,

meso yawo sekeyawone,

buleivo wezadaha kulola kwa meso yawo,

kuhulika kwa magutwi yawo,

kuvimanya muna imizoyo yawo,

na wezasama na kuhonezigwa."

11 Niye niuza, "Mndewa, mbuli ino mbaka zuwaki?"

Nayo kanidika, "Mbaka mabululu vondayasigale matongo,

na kaye vondazipuwe wanhu,

na migunda vondainangigwe.

12 Mbaka niye Mndewa Mulungu vondaniwagale kutali wanhu wose,

isi yose vondaiwe yabule chinhu na haifaya.

13 One wahasigala hanhu longo ha wanhu, iviya wezanangigwa.

Wawo wezalinga fana mbiki wa mvinje hebu mbiki wa mwaloni,

uhakanhigwa wosigala chisiki,

chisiki icho niiyo mbeyu yelile isuka."