1 Mwizagaya mweye wanhu wa Alieli* bululu diyakalile Daudi.

Miyaka yogendelela na madugila yenu yogendelela, mbali uzidilwa wokwiza.

2 Nizadizinga bululu da Alieli kwa bumbila da watowang'hondo,

wanhu wake wezalila kwa usungu,

kumwangu dizakuwa fana hanhu ha kukong'hela moto kuna ulupango.

3 Nizakwika watowang'hondo waditowe bululu da Yelusalemu,

nizadizinga na kuditowa.

4 Mwizagwisigwa hasi ng'hani muna umsanga,

mwizaguta muna dileme,

mbuli zenu zizalawa uko kumsanga,

madizi yenu yezalawa mumsanga fana mizimu.

5 Bumbila da wehi wenu dizakuwa fana timbwisi vidihembeluka,

wasede wezakuwa fana makang'ha yohembelusigwa na mbeho.

6 Mndewa Mulungu Yeli na Udahi kezakwiza kuwataza,

kezakwiza na mibumo na gudemeko da isi na dizi kulu,

kezakwiza na beho na vulavumbi na moto utimbula.

7 Baho watowang'hondo wa zisi zose woditowa bululu da Alieli,

wose wobananga mhongono zake na kuwawonela wanhu wake,

wezazimizigwa fana nzozi,

fana malaguso ya ichilo.

8 Mabumbila yayo yoditowa bululu da Yelusalemu,

yezakuwa fana munhu yeli na nzala na kolota yoja,

mbali yahalamka kuwona yang'hali na nzala,

yezakuwa fana munhu yeli na ng'hilu na kolota yong'wa mazi,

mbali yahalamka kowona yang'hali na ng'hilu.

9 Lelo mweye gendeleleni kuwa wabozi na kwazaganyika,

mutulike yameso sekemulole.

Mukoligwe mbali siyo kwa divai, mzazalike mbali siyo kwa upele.

10 Mndewa Mulungu kamtendani muwe na nhongo ng'hani,

kagubika meso yenu mweye walotezi,

kamgubikani yamatwi mweye watowabao.

11 Kwaviya kumwenu mweye malaguso yano yose yalinga fana usenga wandikigwa muna ichitabu chisingigwe na uhula. Uhamgala munhu yoyose yavimanyile kusoma na uhamulongela, "Unisomele chitabu chino," kezalonga, "Sidaha, kwaviya chisingigwa na uhula." 12 Hebu uhamwing'ha munhu yoyose hadahile kusoma na uhamulongela, "Unisomele chitabu chino," kezalonga, "Sidaha kusoma."

13 Mndewa Mulungu kolonga,

"Wanhu wano wonitambikila mmilomo muhala,

mbali mizoyo yawo yakutali na niye,

wonitambikila kwa kusondelela mbuli zowafunzigwe na wanhu.

14 Ivo nizawatendela kaidi mbuli za kwazanya,

mbuli za kudumbiza na kwazanya.

Ubala wa wabala wizamala,

umanyi wa wanhu wavimanyile wizasegezigwa."

15 Mwizagaya mweye mumfisa Mndewa Mulungu malungilo yenu,

mweye musang'hana mbuli zenu muna diziza na molonga,

"Vino yelihi yochiwona?

Vino yelihi yodaha kuvimanya mbuli zochitenda?"

16 Mweye mohindula mbuli uchanyha hasi.

Vino ulongo ulinga fana munhu yolumba?

Nongo haidaha kumulongela yailumbile,

"Weye hunilumbile."

Chinhu chilumbigwe hachidaha kumulongela yachilumbile,

"Weye huvimanyile chochose."

17 Lung'hali lusita luguhi mbago ya Lebanoni izagalusigwa kuwa mgunda uli na ulongo unogile,

iviya mgunda uli na ulongo unogile wizagalusigwa kuwa mbago.

18 Siku iyo wasuwamagutwi wezahulika usenga usomigwa muna ivitabu,

na vipofu wezakwandusa kuwona.

19 Wanyendanyenda wezamdeng'helela Mndewa Mulungu kaidi,

iviya wanhu wolonda kutazigwa wezamdeng'helela Mulungu Yelile wa Isilaili.

20 Wasede wezakwaga na wakewezi wezakwaga,

na wanhu wose wogesa mbuli zihile wezanangigwa.

21 Wanhu wawo wovavagiza mbuli kuna ichitala,

wolava lushwa kwa wasemi,

na wolonga uvwizi muladi ngayengaye watagusigwe.

22 Ivo Mndewa Mulungu yamkombole Bulahimu kolonga kusonhela welesi wa Yakobo,

"Welesi wa Yakobo hawezagumigwa chinyala kaidi,

hawezaidulika kaidi kwa chinyala.

23 Vondawawawone wana wawo woniwalumbile niye mwenyewo,

wezaditogoza zina jangu jelile,

kweli wezanidumba niye Mulungu Yelile wa Yakobo,

na wezanitambikila niye Mulungu wa Isilaili.

24 Wanhu wabozi wezavimanya,

na wanhu wolongelela wezatogola kufunzigwa."