1 Weye mulungu Beli kugwa, weye mulungu Nebo koidulika.

Lusita lumwe ng'ombe wapapa nyang'hiti zenu,

sambi wanyama walegele wazipapa muna imigongo.

2 Milungu iyo yogwa na yoidulika,

haidaha kuitaza hebu kuilopola,

iviya igaligwa kuutumwa.

3 Mukungu kolonga, "Tegelezeni, mweye welesi wa Yakobo,

tegelezeni, mweye Waisilaili musigale.

Niye nimkalizani kwandusila vimwelekigwe,

nimpapani kwandusila muna izinda za mami zenu.

4 Niye Mulungu wenu sizagaluka mbaka vondamulale,

nizampapani vondamuwe mbaka vondamuwe na uhenga,

nitenda ivo umwaka na sambi nizatenda ivo.

Nizampapani na kumkombolani.

5 "Vino mwizanilinganyiza na yelihi?

Vino kuna imwenga yalingile fana niye?

6 Wanhu wokwasa zahabu kulawa muna imikoba yawo,

wolinga hela muna ziningo zawo,

wamgoneka muhunzi yatende nyang'hiti,

maabaho waitumbalila mavindi na kuinonela.

7 Woitwika nyang'hiti iyo na kuigala,

maabaho woika hanhu hake nayo yokala uko.

Haidaha kugenda haja haikigwe,

one munhu yahalila haidaha kumwidika,

na haidaha kumkombola munhu muna yamagayo yake.

8 "Kumbukeni mbuli ino na kuiuzagiza,

igeseni ng'hani muna imizoyo yenu mweye wahasanyi.

9 Kumbukeni mbuli zinitendile umwaka.

Niye niiyo Mulungu na habule imwenga,

ona niye niiyo Mulungu,

habule imwenga yalingile niye.

10 Kwandusila mwanduso nilonga mbuli za uhelelo,

iviya nigong'onda mbuli zondazilawilile.

Lungilo jangu dizafika.

Nizakomeleza mbuli zangu zose.

11 Nizamtanga munhu kulawa ubanzi wa ulawilo wa zuwa,

kezanyang'hula fana masumula viyonyang'hula,

iyo kezafikiza lungilo jangu kulawa isi ya kutali.

Niye nilonga na nizatenda.

12 Nitegelezeni, mweye muli na mizoyo midala,

nitegelezeni, mweye mulema haki.

13 Siku ya kuwakombola haili kutali,

siku ya kumkombolani yahabehi,

nizadikombola bululu da Sayuni,

na kugala hishima muna iisi ya Isilaili."